एटीएस पथक तपासासाठी उत्तर प्रदेशात

मालेगाव बॉम्बस्फोट ः संशयित आमदार अथवा खासदार नाही
सकाळ वृत्तसेवा
मुंबई, ता. 11 ः मालेगाव बॉम्बस्फोट प्रकरणात उत्तर प्रदेश येथील हिंदुत्ववादी संघटनेच्या बड्या नेत्याच्या चौकशीकरिता दहशतवादविरोधी पथकाची (एटीएस) तुकडी रवाना झाली आहे. हा नेता कोणत्याही पक्षाचा आमदार अथवा खासदार नसल्याचे या पथकाच्या अधिकाऱ्यांनी सांगितले. या प्रकरणी अटकेत असलेल्या लेफ्टनंट कर्नल प्रसाद श्रीकांत पुरोहित याचे सनातन संस्थेच्या कार्यकर्त्यांसोबत असलेल्या संबंधांबाबत या अधिकाऱ्याने बोलण्यास नकार दिला.
मालेगाव बॉम्बस्फोटाचा तपास करणाऱ्या दहशतवादविरोधी पथकाने प्रमुख सूत्रधार साध्वी प्रज्ञासिंग ठाकूर हिच्यासह नऊ जणांना अटक केली. अभिनव भारत संघटनेशी संबंधित असलेल्या या आरोपींच्या आतापर्यंत केलेली चौकशीत; तसेच नार्को चाचण्यांमध्ये उत्तर प्रदेश येथील हिंदुत्ववादी संघटनेच्या मोठ्या नेत्याचे नाव समोर आले. त्यानुसार दहशतवादविरोधी पथकाने या नेत्याच्या चौकशीकरिता उत्तर प्रदेश सरकारचे सहकार्य मिळण्यासाठी काल नाशिक येथील न्यायालयाकडे अर्ज दिला. नाशिक न्यायालयाने या नेत्याच्या चौकशीसाठी दिलेल्या परवानगीनंतर दहशतवादविरोधी पथकाने एक तुकडी आज रवाना केली. या प्रकरणात उत्तर प्रदेशमधील आमदार व खासदाराची चौकशी केली जाणार असल्याचे सांगण्यात येत होते. त्यातच गोरखपूर येथील भारतीय जनता पक्षाचे खासदार योगी आदित्यनाथ यांनी हिंमत असल्यास एटीएसच्या पथकाने कारवाई करून दाखवावी, असे खुले आव्हान केंद्रीय गृहखात्याला दिले.
या संपूर्ण घटनाक्रमाबाबत बोलताना आज दहशतवादविरोधी पथकाच्या अधिकाऱ्यांनी नेहमीप्रमाणे तोंडावर बोट ठेवले. उत्तर प्रदेशमध्ये चौकशी होणारा नेता कोणत्याही पक्षाचा आमदार अथवा खासदार नसल्याचे या अधिकाऱ्यांनी सांगितले. मालेगाव स्फोटातील संशयित लेफ्टनंट कर्नल प्रसाद पुरोहित याचे ठाण्याच्या गडकरी रंगायतनमध्ये बॉम्बस्फोट घडविणाऱ्या डॉ. हेमंत चाळके याच्याशी संबंध असल्याचे बोलले जाते. मात्र याबाबत दहशतवादविरोधी पथकाच्या अधिकाऱ्यांनी कोणतेही वक्तव्य करण्यास नकार दिला.