प्रज्ञासिंग आणि पुरोहित यांच्या चौकशीसाठी हरियाना पोलिस मुंबईत

संभाव्य सहभाग ः "समझौता एक्‍स्प्रेस'मधील स्फोट प्रकरण
सकाळ वृत्तसेवा
मुंबई, ता. 13 ः मालेगाव बॉम्बस्फोटातील मुख्य आरोपी साध्वी प्रज्ञासिंग ठाकूर आणि लेफ्टनंट प्रसाद पुरोहित यांच्या गेल्या वर्षी समझौता एक्‍स्प्रेसमध्ये झालेल्या बॉम्बस्फोटात असलेल्या संभाव्य सहभागाच्या चौकशीसाठी हरियाना पोलिसांचे पथक मुंबईत येणार आहे. दरम्यान, उत्तर प्रदेश येथून अटक करण्यात आलेला दयानंद पांडे ऊर्फ स्वामी अमृतानंद देव भारतीय सैन्याच्या हवाई दलातून प्रशिक्षण सुरू असताना खडकवासलाच्या राष्ट्रीय संरक्षण प्रबोधिनीतून निघून गेला होता, असेही वृत्त आहे. मात्र दहशतवादविरोधी पथकाच्या (एटीएस) अधिकाऱ्यांनी त्याला दुजोरा दिला नाही.
मालेगाव बॉम्बस्फोटांचा तपास करणाऱ्या एटीएसने या प्रकरणाची सूत्रधार साध्वी प्रज्ञासिंग ठाकूर हिच्यासह 10 आरोपींना अटक केली. या प्रकरणी अटकेत असलेला लेफ्टनंट कर्नल प्रसाद श्रीकांत पुरोहित याचा गेल्या वर्षी फेब्रुवारी महिन्यात समझौता एक्‍स्प्रेसमध्ये झालेल्या स्फोटांत सहभाग असल्याची शक्‍यता वर्तविण्यात येत आहे. 68 लोकांचे प्राण घेणाऱ्या समझौता एक्‍स्प्रेसमधील स्फोटासाठी इंदौर येथून बॉम्ब तयार करण्यात आले होते. या स्फोटांत रेल्वेच्या दोन बोगी उद्‌ध्वस्त झाल्या होत्या. स्फोटांकरिता वापरण्यात आलेली सुटकेसदेखील इंदौर येथीलच असल्याचे स्पष्ट झाल्यानंतर या स्फोटांप्रकरणी लेफ्टनंट पुरोहितवर संशय व्यक्‍त करण्यात येत आहे. दिल्ली ते लाहोर धावणाऱ्या या एक्‍स्प्रेसमध्ये झालेल्या स्फोटात असलेल्या संभाव्य सहभागाची चौकशी करण्यासाठी हरियाना पोलिसांचे पथक मुंबईत येत आहे. हे पथक साध्वी प्रज्ञासिंग व लेफ्टनंट पुरोहित यांची चौकशी करणार असल्याचे सूत्रांनी सांगितले. मात्र एटीएसच्या अधिकाऱ्यांनी याबाबत अधिकृतरीत्या कोणतीही माहिती दिली नाही.
उत्तर प्रदेशातून अटक करण्यात आलेला आध्यात्मिक गुरू दयानंद पांडे ऊर्फ स्वामी अमृतानंद देव यालादेखील उद्या मुंबईत आणण्यात येणार आहे. सध्या त्याची कानपूर येथेच चौकशी सुरू असल्याची माहिती एटीएसच्या अधिकाऱ्यांनी दिली. जम्मू येथे कथित मठाधिपती असलेला पांडे भारतीय सैन्यात होता. खडकवासला येथील राष्ट्रीय संरक्षण प्रबोधिनीत हवाई दलाच्या प्रशिक्षणासाठी आल्यानंतर जेमतेम सहा महिने प्रशिक्षण घेऊन तो निघून गेल्याचेही सूत्रांनी सांगितले. एटीएसच्या पथकाने उत्तर प्रदेश पोलिसांच्या मदतीने आज त्याच्याविरुद्ध सबळ पुरावे मिळण्यासाठी फरिदाबाद येथील अनगपूरच्या चक्रधर मठावरही छापा घातला. पोलिसांना लेफ्टनंट कर्नल प्रसाद पुरोहित याचा गहाळ झालेला लॅपटॉप सापडला असून या लॅपटॉपमध्ये स्फोटाशी संबंधित आणखी महत्त्वपूर्ण माहिती पुढे येण्याची शक्‍यता वर्तविण्यात येत आहे.