बॉम्बस्फोटांचा मास्टरमाईंड दयानंद पांडे?

एटीएसचे मौन ः पुरोहित यांची नार्को टेस्टमध्ये कबुली
सकाळ वृत्तसेवा
मुंबई, ता. 14 ः मालेगाव बॉम्बस्फोटांप्रकरणी दहशतवादविरोधी पथका (एटीएस) ने उत्तर प्रदेश येथून अटक केलेले दयानंद पांडे ऊर्फ स्वामी अमृतानंद देव यांना नाशिक न्यायालयाने 26 नोव्हेंबरपर्यंत पोलिस कोठडीचे आदेश दिले. दरम्यान, दयानंद पांडे अजमेर व मालेगाव बॉम्बस्फोटांचा "मास्टरमाईंड' आहे. त्यांच्याच निर्देशांवरून मालेगाव बॉम्बस्फोटासाठी स्फोटके पुरविल्याची धक्कादायक माहिती लेफ्टनंट पुरोहित यांच्या नार्को चाचणीत उघडकीस आल्याचे वृत्त आहे. दहशती कारवायांसाठी पाचशे जणांना प्रशिक्षण दिल्याची कबुलीही पुरोहित यांनी या चाचणीत दिल्याचे सांगण्यात येते. याबाबत एटीएसच्या अधिकाऱ्यांनी काहीही सांगण्यास नकार दिला.
मालेगाव स्फोटातील सहभागाप्रकरणी कानपूर येथून अटक करण्यात आलेल्या दयानंद पांडे यांना आज दुपारी नाशिक येथील न्यायालयासमोर हजर करण्यात आले. त्यांच्या चौकशीत पोलिसांना स्फोटासंबंधी महत्त्वपूर्ण माहिती मिळण्याची शक्‍यता वर्तविण्यात येत आहे. जम्मूच्या आश्रमाचा मठाधिपती असलेल्या पांडे चार वर्षांपासून फरिदाबाद येथील मंदिरात नेहमी जात असे. मुख्यतः रात्री उशिरा त्यांना भेटण्यासाठी "हायप्रोफाईल' भक्त येत. सामान्य भक्तांपासून लांब राहणारा हा कथित स्वामी नेहमी लॅपटॉपवर काम करताना दिसायचा. ते कानपूरमध्ये दयानंद पांडे, फरिदाबादमध्ये स्वामी अमृतानंद देव; तर जम्मूत पिठाधीश्‍वर या नावाने ओळखले जातात. पांडे यांनीच मालेगाव स्फोटाप्रकरणी अटकेत असलेल्या लेफ्टनंट पुरोहित व साध्वी प्रज्ञासिंग यांची भेट घडवून दिल्याचे सांगितले जाते.
बेंगळूरुच्या फॉरेन्सिक सायन्स लॅबमध्ये लेफ्टनंट पुरोहित यांची नुकतीच नार्को चाचणी करण्यात आली. या चाचणीच्या अहवालानुसार पुरोहित यांनी केलेल्या गुन्ह्याची कबुली दिली आहे. 11 सप्टेंबर 2007 रोजी अजमेर व मालेगाव येथे 29 सप्टेंबर 2008 ला झालेल्या बॉम्बस्फोटांचा मास्टरमाईंड दयानंद पांडे आहे. सिमीच्या दहशती कारवायांना चोख उत्तर देण्यासाठी हे कट आखण्यात आले. त्याकरिता सिमीच्याच कार्यपद्धतीचा अवलंब करण्यात आला. आतापर्यंत पाचशे जणांना दहशती कारवायांचे प्रशिक्षण देण्यात आल्याचेही पुरोहित यांनी या चाचणीत कबूल केल्याचे म्हटले आहे. या प्रशिक्षणार्थींना अहमदाबाद येथील आश्रमात आश्रय मिळत होता. मालेगाव स्फोटाचा कट साध्वी प्रज्ञासिंग, दयानंद पांडे व पुरोहित यांनी आखल्याचेही सांगण्यात येते. 12 एप्रिल 2008 मध्ये भोपाळ येथे झालेल्या बैठकीला हे तिघेही उपस्थित होते. मालेगाव स्फोटांपूर्वी पुण्यातील एका बैठकीला देखील हे तिघे हजर होते, असेही सांगितले जाते.