दहशतवादी देत होते पगारातील 10 टक्के रक्कम

राकेश मारिया ः धार्मिक काम करीत असल्याचा समज
सकाळ वृत्तसेवा
मुंबई, ता. 16 ः बहुराष्ट्रीय कंपन्यांमध्ये गलेलठ्ठ पगारावर काम करणारे इंडियन मुजाहिदीनचे दशहतवादी ते करीत असलेले काम धार्मिक असल्याचे समजत आहेत. संघटनेचा थिंक टॅंक तसेच देशभरातील बॉम्बस्फोटांचा सूत्रधार रियाज भटकळ त्यासाठी मासिक पगारातील दहा टक्के रक्कम देत होते, अशी माहिती गुन्हे शाखेच्या पोलिसांनी अटक केलेल्या दहशतवाद्यांच्या चौकशीत उघडकीस आल्याचे गुन्हे शाखेचे सहपोलिस आयुक्त राकेश मारिया यांनी पत्रकारांना सांगितले.
तीन वर्षांत देशभरात घातपात घडविणाऱ्या इंडियन मुजाहिदीनच्या 20 कडव्या दहशतवाद्यांना गुन्हे शाखेच्या पोलिसांनी देशभर छापे घालून अटक केली. या दशहतवाद्यांमध्ये इंडियन मुजाहिदीनच्या मीडिया विंगमध्ये काम करणाऱ्या तीन संगणकतज्ज्ञांसह नऊ कॉम्प्युटर इंजिनिअर व एका मेकॅनिकल इंजिनिअरचा समावेश आहे. बहुराष्ट्रीय कंपन्यांत उच्चपदस्थ असलेल्या या दहशतवाद्यांना वार्षिक लाखो रुपयांच्या पगाराचे पॅकेज होते. याहू इंडियासारख्या कंपनीत प्रिन्सिपल सॉफ्टवेअर इंजिनिअर म्हणून काम करणाऱ्या पुण्यातील मोहम्मद मन्सूर असगर पिरबॉय या संगणकतज्ज्ञाला वार्षिक 19 लाख रुपये पगार मिळत होता. महिन्याअखेरीस अतिशय चांगला पगार घेणाऱ्या या दहशतवाद्यांना बॉम्बस्फोटांचा सूत्रधार रियाज भटकळ ऊर्फ रोशन खान याने धर्माच्या नावाने चांगलेच बनविल्याचे अटक केलेल्यांच्या चौकशीत उघडकीस येत आहे. आपण करीत असलेले काम धार्मिक असल्याने त्याकरिता मासिक दहा टक्के रक्कम बाजूला काढून ठेवण्यास रियाजने त्यांना सुचविले होते. गरिबी असल्याने धार्मिक कार्यासाठी आपण प्रसंगी फूटपाथ व मशिदीत राहत असल्याचेही रियाजने त्यांना सांगितले होते. रियाजच्या सांगण्यावरून हे उच्चपदस्थ महिन्याच्या शेवटी त्याला एकूण पगारातील दहा टक्के रक्कम देत असत. त्यांच्याकडून आलेल्या पैशांचा वापर रियाज स्वतःसाठी करीत असे. याच पैशांच्या मदतीने त्याने मंगळूर येथील सुभाषनगर परिसरात बांधकाम व्यवसाय सुरू केला होता. गुन्हे शाखेच्या पोलिसांनी सुभाषनगर येथील त्याच्या घरात छापा घातला तेव्हा त्याचे आलिशान घर पाहून पोलिसही चाट पडले होते. धर्माच्या नावे रियाजने आपल्याला फसविल्याची भावनादेखील या अतिरेक्‍यांमध्ये येत असल्याचे सह पोलिस आयुक्त मारिया यांनी या वेळी पत्रकारांना सांगितले. पुण्याच्या कोंढवा ख
ुर्द येथील अशोका म्युज इमारतीतून पोलिसांना सापडलेल्या औषधसाठ्याचा वापर अतिरेकी बिल्डर व ज्वेलर्सच्या अपहरणासाठी करणार असल्याचे स्पष्ट झाल्यानंतर या दोघांचे अपहरण करून दोन ते पाच कोटी रुपयांची खंडणी उकळण्याचा अतिरेक्‍यांचा डाव होता, अशी माहितीही पुढे आली आहे. पुण्यातून अटक केलेल्या अतिरेक्‍यांपैकी मोहम्मद अतिक इक्‍बाल याने भूल देणाऱ्या या औषधांची चाचणी मोहम्मद अकबर चौधरी आणि माजीद शेख यांच्यावर केली. जानेवारीच्या पहिल्या आठवड्यात झालेल्या या चाचणीमुळे दोघेही तीन तासांहून अधिक काळ बेशुद्ध झाले होते. बिल्डर व ज्वेलरच्या अपहरणासाठी स्कॉर्पिओ गाडी वापरण्यात येणार होती; मात्र त्यापूर्वीच त्यांना अटक झाल्याचे मारिया यांनी सांगितले.