रियाजच्या चिथावणीमुळे बुद्धिमान तरुण दहशतवादाकडे

मुंबईतही बैठका ः इंडियन मुजाहिदीनमध्ये दहा इंजिनिअर

सकाळ वृत्तसेवा
मुंबई, ता. 7 ः मुस्लिम समाजातील उच्चशिक्षित तरुण पिढीला इंडियन मुजाहिदीन संघटनेत सहभागी करून घेण्याकरिता तिचा संस्थापक सदस्य रियाज भटकळ मुंबईत कुर्ला व ट्रॉम्बे परिसरात बैठका घेत होता. देश-विदेशात मुस्लिमांवर झालेल्या अत्याचारांचे प्रवचनाद्वारे कथन करणाऱ्या रियाजच्या चिथावणीखोर भाषणांनी कितीतरी तरुण या संघटनेत सहभागी झाल्याचे पोलिसांचे म्हणणे आहे.

रियाज भटकळने दिलेल्या जिहादी शिकवणीवरून सुरुवातीला महम्मद सादीक शेख व अन्सार अहमद बादशाह शेख त्याच्या कारवायांकडे आकृष्ट झाले. यानंतर दोघांनी आझमगढ येथील मोहम्मद आरीफ शेखला जेहादी प्रशिक्षण दिले. यानंतर आरीफने मोहम्मद आतिकला प्रशिक्षण दिले व पुढे आरीफकडूनच आझमगढच्या संजरपूर येथील अतिरेक्‍यांच्या गटाला जेहादाची शिकवण देण्यात आली.
रियाजकडून मिळालेल्या शिकवणुकीतून पुण्यातील गटातही धार्मिक कट्टरतेची बीजे पेरली गेली. कुशाग्र बुद्धिमत्तेचे तरुण या शिकवणुकीला भुलून इंडियन मुजाहिदीनच्या देशविघातक कारवायांत अडकल्याची माहिती गुन्हे शाखेच्या वरिष्ठ पोलिस अधिकाऱ्यांनी दिली. रियाज भटकळने सुरुवातीला पुण्यात अकबर चौधरी या तरुणाला प्रशिक्षण दिले. त्याच्या माध्यमातून पुढे निष्णात संगणकतज्ज्ञ असलेला मोहम्मद मन्सूर असगर पिरबॉय व त्याचे साथीदार या संघटनेशी जोडले गेल्याचेही या अधिकाऱ्याने सांगितले.

दहा इंजिनिअर
इंडियन मुजाहिदीनच्या वीस कडव्या अतिरेक्‍यांत 9 सॉफ्टवेअर इंजिनिअर व एका मेकॅनिकल इंजिनिअरचा समावेश आहे. 25 ते 35 वयोगटातील कुशाग्र बुद्धिमत्तेच्या या तरुणांचा अतिरेकी कारवायांसाठी वापर करून घेताना आधुनिक तंत्रज्ञानाचा मोठ्या प्रमाणावर वापर झाला. या अतिरेकी कारवायांचे प्रशिक्षण देत असताना इंडियन मुजाहिदीनने यातील काहींना लॅपटॉपही पुरविले होते. त्यातूनच डिजिटल टायमर बॉम्बची संकल्पना पुढे आल्याचे सह पोलिस आयुक्त राकेश मारिया यांनी सांगितले.

आयएसआयचे ट्रेनिंग
इंडियन मुजाहिदीनच्या अतिरेक्‍यांना प्रशिक्षणासाठी पाकिस्तानात पाठविण्यात येत असे. तेथे आयएसआयचा अधिकारी मेजर आतिक भाई या अतिरेक्‍यांना स्फोटांसंबंधीचे; तसेच बॉम्ब बनविण्याचे प्रशिक्षण देतो. आतापर्यंत मोहम्मद सादीक शेख, मोहम्मद आरीफ शेख, अन्सार अहमद शेख, मोहम्मद झाकिर शेख व अफजल उस्मानी यांना पाकिस्तानात प्रशिक्षण देण्यात आल्याचे पोलिस अधिकाऱ्यांनी सांगितले