इंडियन मुजाहिदीन'च्या अतिरेक्‍यांना "आयएसआय'कडून अर्थपुरवठा

घातपाती कारवाया : "लष्कर-ए-तैय्यबा'कडून प्रशिक्षण

ज्ञानेश चव्हाण : सकाळ वृत्तसेवा
मुंबई, ता. 10 ः इंडियन मुजाहिदीन संघटनेच्या अतिरेक्‍यांना देशभरात घातपाती कारवाया घडविण्यासाठी पाकिस्तानी गुप्तचर संघटना "आयएसआय'कडून अर्थपुरवठा होत असल्याचे उघडकीस आले आहे. गुन्हे शाखेच्या पोलिसांनी अटक केलेल्या अतिरेक्‍यांच्या चौकशीत ही खळबळजनक बाब उघडकीस आल्याची माहिती अतिरिक्त पोलिस आयुक्त देवेन भारती यांनी "सकाळ'शी बोलताना दिली.
दरम्यान, या अतिरेक्‍यांनी गेल्या तीन वर्षांत देशभरात केलेल्या बॉम्बस्फोटांसाठी "आयएसआय'कडून अर्थपुरवठा; तर 'लष्कर ए तैय्यबा'कडून अतिरेक्‍यांना प्रशिक्षण देण्यात आल्याचेही स्पष्ट झाले आहे.
देशभरात 2005 पासून बॉम्बस्फोट घडविणाऱ्या "इंडियन मुजाहिदीन'च्या 20 अतिरेक्‍यांना गुन्हे शाखेच्या पोलिसांनी मुंबई, आझमगड, दिल्ली, मंगळूरसह देशभर छापे घालून अटक केल्यानंतर या शाखेच्या पोलिसांनी या संघटनेच्या आर्थिक नाड्या आवळायला सुरुवात केली आहे. "इंडियन मुजाहिदीन'ला घातपात घडविण्याकरिता आखाती देशातून आर्थिक रसद पुरविली जात असल्याचा प्राथमिक अंदाज व्यक्त केला जात होता; मात्र गुन्हे शाखेच्या पोलिसांनी अटक केलेल्या अतिरेक्‍यांच्या चौकशीत हा पैसा "आयएसआय'कडूनच येत असल्याचे स्पष्ट झाले आहे. मुंबईसह "इंडियन मुजाहिदीन', तसेच "सिमी' कार्यकर्त्यांचे छुपे जाळे असलेल्या परिसरातील राष्ट्रीयीकृत बॅंकांत हे पैसे नियमित गोळा केले जातात. गुन्हे शाखेच्या पोलिसांनी अशी काही बचत खाती नुकतीच गोठविली आहेत. हवालामार्गे पाकिस्तान ते इराण व पुढे भारत असा हा अर्थपुरवठा होत असल्याचे स्पष्ट झाले आहे. याच मार्गाने या अतिरेक्‍यांना भारतातून प्रशिक्षणासाठी पाठविण्यात येते. दिल्लीच्या जामियानगर येथील पोलिस कारवाईत मारल्या गेलेल्या आतिकच्या खात्यावर काही महिन्यांतच तीन कोटी रुपयांची उलाढाल झाल्याचे उघडकीस आले आहे.
घातपाती कारवायांकरिता येणाऱ्या या पैशांचे वितरण इंडियन मुजाहिदीनचा "थिंकटॅंक' रियाज भटकळ याच्याकडे आहे. इंडियन मुजाहिदीनचे कंट्रोल रूम बनविण्यासाठी पुण्यातील कोंढवा खुर्द येथील अशोका म्युझ या इमारतीतील घर भाड्याने घेण्यात आले होते. त्यासाठी लागणारी 12 हजार रुपयांची अनामत रक्कम व चार हजार रुपयांचे मासिक भाडेही रियाजच देत होता. या ठिकाणी तयार करण्यात आलेल्या इंडियन मुजाहिदीनच्या "मीडिया विंग'ला कॉम्प्युटर, लॅपटॉप अशा साधनसामग्रीसह बॉम्ब बनविणे, तसेच स्फोट घडविण्यासाठी आवश्‍यक त्या सर्व साधनांकरिता लागणारा खर्च आदी बाबी रियाज किंवा त्याचा भाऊ इक्‍बाल पाहत असल्याची माहिती गुन्हे शाखेचे सहपोलिस आयुक्त राकेश मारिया यांनी दिली.