इंडियन मुजाहिदीनच्या 15 अतिरेक्‍यांना अटक

मुंबई पोलिसांचे छापे ः पुणे, परभणी, मंगळूर येथे कारवाई

सकाळ वृत्तसेवा
मुंबई, ता. 6 ः देशभरात घातपात घडविणाऱ्या इंडियन मुजाहिदीनच्या आणखी पंधरा अतिरेक्‍यांना गुन्हे शाखेच्या पोलिसांनी पुणे, परभणी व मंगळूर येथून अटक केली. अहमदाबाद, सुरत, बंगळूरु, हैदराबाद व नवी दिल्ली येथे बॉम्बस्फोट घडविण्यात या अतिरेक्‍यांचा सहभाग असल्याचे स्पष्ट झाले असून आरोपींमध्ये इंडियन मुजाहिदीनची "मीडिया विंग' चालविणाऱ्या पुण्यातील तिघा संगणकतज्ज्ञांचा समावेश असल्याचे पोलिस आयुक्त हसन गफूर यांनी आज पत्रकार परिषदेत सांगितले. या आरोपींकडून पोलिसांनी दोन पिस्तुले, 45 जिवंत काडतुसे, बुलेटप्रुफ जॅकेट, लाईफ जॅकेट, सहा लॅपटॉप, वायफाय राऊटर तसेच साडेअकरा लाख रुपयांची रोख जप्त केल्याचेही गफूर यांनी सांगितले. हैदराबाद बॉम्बस्फोटाची योजना मुंबईत चिता कॅम्प येथे आखण्यात आली होती. या संपूर्ण कारवाईत इंडियन मुजाहिदीनचा "थिंक टॅंक' समजल्या जाणाऱ्या कुख्यात अतिरेकी रियाज भटकळ व त्याचा भाऊ इक्‍बाल यांना पकडण्यात पोलिसांना अद्याप यश आलेले नाही, त्यांचा शोध सुरू असल्याचेही आयुक्त गफूर या वेळी म्हणाले.

देशभरात घातपात घडविणाऱ्या इंडियन मुजाहिदीनच्या पाच कडव्या अतिरेक्‍यांना मुंबईत अटक झाल्यानंतर त्यांच्याकडून मिळालेल्या माहितीच्या आधारे गुन्हे शाखा, दहशतवादविरोधी पथक, विशेष शाखा यांच्यासह आयबी व रॉच्या अधिकाऱ्यांनी देशभरात शोधमोहीम हाती घेतली. त्या अनुषंगाने मुंबई गुन्हे शाखेच्या पोलिसांनी पुणे, सोलापूर, परभणीसह कर्नाटक व आझमगढ येथे छापे घातले. त्यानुसार पोलिसांना इंडियन मुजाहिदीनची "मीडिया विंग' संभाळणाऱ्या महम्मद मन्सुर असगर पिरबॉय (31), मोबीन कादर शेख ऊर्फ सलमान (24), आसिफ बशीर शेख (22) या तिघांसह त्यांचा साथीदार मोहम्मद अकबर इस्माईल चौधरी (28) यांना पुण्यातून अटक केली. महम्मद मन्सुर पिरबॉय पुण्यातील एका मल्टिनॅशनल कंपनीत प्रिन्सिपल सॉफ्टवेअर इंजिनिअर म्हणून काम करतो. वार्षिक 19 लाख रुपयांच्या पगाराचे पॅकेज असलेला पिरबॉय इंडियन मुजाहिदीनचा सक्रिय कार्यकर्ता आहे. त्याचा साथीदार मोबीन शेख हा एका आयटी कंपनीत सिनिअर टेक्‍निकल ऍडवायजर; तर आसिफ बशीर शेख हा मेकॅनिकल इंजिनिअर आहे. या तिघांनी मोहम्मद चौधरीसोबत सानापाड्याच्या गुनानी इमारतीतून केनेथ हेवूड या अमेरिकन नागरिकाच्या वायफाय कनेक्‍शनच्या मदतीने अहमदाबाद स्फोटांच्या धमकीचा ई-मेल पाठविला होता. त्यापूर्वी या आरोपींनी सानापाडा, चेंबूर, सायन व छत्रपती शिवाजी टर्मिनस येथून हे ई-मेल पाठविता येतात का, याची पाहणी केली होती. या वेळी वापरलेली निळ्या रंगाची मारुती एस्टीम गाडी त्यांनी खालसा महाविद्यालयातून धमकीचा ई-मेल पाठवितानाही वापरली होती. दिल्ली स्फोटांचा ई-मेल पाठविण्यासाठी त्यांनी चेंबूरच्या कमानी पॉवर कंपनीच्या राऊटरचा वापर केल्याची माहिती पोलिसांनी दिली. धमकीच्या ई-मेलमधील मजकूर, कुख्यात अतिरेकी रियाज भटकळ ऊर्फ रोशन खान याच्या सांगण्यावरून हेच तिघे तयार करीत असत. मोह
म्मद चौधरीचा अहमदाबाद व सुरत स्फोटांत सहभाग आहे. स्फोटांच्या काही दिवसांपूर्वी सुरतमध्ये याकुब नावाने घर भाड्याने घेऊन या घरात अतिरेक्‍यांना आश्रय देण्यात आला होता. याच घरात त्यांनी स्फोटांत वापरलेले बॉम्ब बनविल्याचेही उघड झाले आहे. हैदराबादमध्ये 25 ऑगस्टला झालेल्या बॉम्बस्फोटांचा कट मुंबईत चिता कॅम्प येथे रचण्यात आला. त्या कटासाठी घेण्यात आलेल्या बैठकीला रियाज भटकळ, इंडियन मुजाहिदीनचा थिंक टॅंक महम्मद सादीक इसरार अमहद शेख व नुकताच अटक केलेला मोहम्मद अन्सार अहमद शेख (35) हे तिघे उपस्थित होते. अटक केलेल्या अतिरेक्‍यांपैकी अनिस शकील सय्यद (26) याने लुंबीनी पार्क येथे बॉम्ब ठेवल्याची कबुली दिली; तर रियाज भटकळने स्वतः गोकुळनगर चाट भंडार येथे बॉम्ब पेरले होते, अशी माहिती पोलिस आयुक्त गफूर यांनी या वेळी दिली.

अतिरेकी व त्यांचा सहभाग स्पष्ट करणारा तक्ता

पकडलेला अतिरेकी वय शिक्षण व्यवसाय अतिरेकी संघटना

- मोहम्मद आतिक मोहम्मद (25) - कॉम्प्युटर सायन्स पदवीधर - इंडियन मुजाहिदीचा सक्रिय सदस्य
- दस्तगीर फिरोज मुजावर (25) - वाणिज्य शाखा पदवीधर - जिहादींना अतिरेकी प्रशिक्षण देण्यात सहभागी
- माजिद अकबर शेख (26) - मोबाईल रिपेअरिंगचे दुकान - सुरत व अहमदाबाद स्फोटांचा कट रचण्यात सहभाग
- यासिर अनिस सय्यद (20) - मोबाईल रिपेअरिंगचे दुकान - इंडियन मुजाहिदीनचा सक्रिय कार्यकर्ता,
कट रचण्यात सहभाग
- फारूख शफरूद्दीन टरकश (25) - वाणिज्य पदवीधर - इंडियन मुजाहिदीनचा कार्यकर्ता, कट रचण्यात सहभाग
- फजल ए रहमान दुरानी (23) - रेकॉर्डवरील दरोडेखोर - सुरत व अहमदाबाद स्फोटांत सहभाग
- अहमद बावा अबुबकर (33) - व्यवसाय - सुरत व अहमदाबाद स्फोटांत सहभाग
- मोहम्मद अली अहमद (44) - सिव्हिल कॉन्ट्रॅक्‍टर - इंडियन मुजाहिदीनच्या अतिरेक्‍यांना लपण्यासाठी घर
उपलब्ध करून देणे
- जावेद अली (19) - अरेबिक शाळेतील विद्यार्थी - इंडियन मुजाहिदीनचा सक्रिय सदस्य, कटात सहभाग
- सय्यद मोहम्मद नौशाद (25) - सिव्हिल कॉन्ट्रॅक्‍टर - सुरत बॉम्बस्फोटांत सहभाग.
...

26 ऑक्‍टोबरला मुंबईत घातपात

दिल्लीच्या जामियानगरमध्ये झालेल्या एन्काऊंटरमध्ये पोलिसांनी अटक केलेल्या इंडियन मुजाहिदीनच्या दोघा अतिरेक्‍यांच्या चौकशीत मुंबईत येत्या 26 ऑक्‍टोबर रोजी घातपात घडविण्यात येणार असल्याची माहिती उघडकीस आल्याचे दहशतवाद विरोधी पथकाचे सहपोलिस आयुक्त हेमंत करकरे यांनी यावेळी दिली. पोलिसांनी अटक केलेल्या अतिरेक्‍यांनी नवरात्रौत्सवाच्या काळातही मुंबईत स्फोट घडविण्याची तयारी केली होती, अशी माहितीही पोलिस आयुक्त हसन गफूर यांनी दिली.
-----------------------------

रियाज भटकळकडून मिळाले प्रशिक्षण

अटक केलेल्या अतिरेक्‍यांपैकी सहा अतिरेक्‍यांना पाकिस्तान व बांगलादेशात प्रशिक्षण देण्यात आले. तर उर्वरितांना रियाज भटकळ याने प्रशिक्षण दिल्याची माहिती गुन्हे शाखेचे सहपोलिस आयुक्त राकेश मारिया यांनी दिली. पोलिसांना त्यांच्याकडून मोठ्या प्रमाणावर जिहादी साहित्य व व्हीसीडी मिळाल्या आहेत. या व्हीसीडींमध्ये परदेशात तसेच भारतातील घटनांचे छायाचित्रण आहे. या आधारे मुस्लिम तरुणांच्या मनात तेढ निर्माण करून त्यांना देशविघातक कृत्य करण्यास चिथावले जात असल्याचे पोलिसांनी सांगितले.
--------------------


पोलिस शोधतायत "आयएम'ची इकोनॉमिक पाईपलाईन...

गुन्हे शाखेच्या पोलिसांनी अटक केलेल्या "इंडियन मुजाहिदीन'च्या अतिरेक्‍यांकडून साडेअकरा लाख रुपयांची रोकड हस्तगत केली आहे. या अतिरेक्‍यांना स्फोट घडविण्यासाठी हवाला मार्गाने लाखो रुपये; तर स्फोटकांचा साठा बेंगळूरु व दक्षिण भारतातून येतो. पोलिस "इंडियन मुजाहिदीन'ला पतपुरवठा करणाऱ्यांचा शोध घेत असल्याची माहिती पोलिस आयुक्त हसन गफूर यांनी दिली.
--------------------------------------

"कॉम्प्युटर हॅकिंग'साठी "आयएम'ला दिले प्रत्येकी 70 हजार

कॉम्प्युटर हॅकिंगचा कोर्स करण्यासाठी "आयएम'ला दिले प्रत्येकी 70हजार रुपये
"इंडियन मुजाहिदीन'च्या मीडिया विंगमध्ये काम करण्यासाठी कॉम्प्युटर हॅक करता येणे आवश्‍यक असल्याने संघटनेने मोहम्मद मन्सूर पीरबॉय व मोबीन सलमान शेख या कॉम्प्युटर एक्‍सपर्टस्‌ना हॅकिंगचा कोर्स करायला लावला. एका वेळी आठ ते दहा जणांच्या गटाला प्रशिक्षण देणाऱ्या एका खासगी कॉम्प्युटर प्रशिक्षण संस्थेकडून हा कोर्स शिकविण्यात येत होता. त्यासाठी प्रत्येकी 70 हजार रुपये देण्यात आले होते, अशी माहिती उघडकीस आली आहे.
-----