अभिनेता बनण्यासाठी घरफोड्या

पवईत अटक ः वृत्तपत्रातून घेतली चोरीची प्रेरणा

सकाळ वृत्तसेवा
मुंबई, ता. 8 ः तो तसा मूळचा नेपाळी कुटुंबातला. लहानपण मुंबईतलेच. दिसायला स्मार्ट; इंग्रजी, मराठी व हिंदी या भाषांवरील प्रभुत्वामुळे चित्रपटांत अभिनेता होण्याची त्याची लहानपणापासूनची महत्त्वाकांक्षा. हे स्वप्न पूर्ण करण्यासाठी त्याने खास ऍक्‍टिंग ट्रेनिंग स्कूलमध्येही प्रवेश घेतला. घरच्या गरिबीमुळे अभिनेता बनण्यासाठी लागणारा खर्च परवडेनासा झाला. एक दिवस मराठी वृत्तपत्रात वाचलेल्या घरफोडीच्या एका बातमीवरून प्रेरणा घेऊन त्याने घरफोड्या करायला सुरुवात केली. पवई येथील एका घरातून चोरी केलेल्या एका क्रेडिट कार्डमुळे तो शेवटी पोलिसांच्या जाळ्यात सापडला. पवई परिसरात गेल्या दीड वर्षात 31 हून अधिक घरे फोडलेल्या या चोरट्याने केलेल्या तब्बल 15 मोठ्या घरफोड्या उघडकीस आल्या आहेत. पोलिसांनी त्याच्याकडून साडेअकरा लाखांची रोख रक्कम व एक लॅपटॉप असा ऐवज हस्तगत केला.
दादर येथे राहणाऱ्या या 32 वर्षीय चोरट्याचे नाव राहुल थापा असून, तो लहानपणापासूनच चंदेरी दुनियेत करिअर करण्यासाठी धडपडत होता; मात्र अभिनेता होण्यासाठी लागणारा खर्च त्याच्यासारख्या गरीब तरुणाला न परवडणारा. यातून मार्ग काढण्यासाठी त्याने तरुणाईला आपल्या तालावर थिरकवणारे "डीजे' वाजवायला सुरुवात केली. अभिनेता व्हायचे असेल, तर पहिले त्याचे सगळे गुण अंगी बाळगायला हवेत, या विचाराने तो कधी कधी दिल्ली ते मुंबई हा प्रवास विमानानेही करायचा; मात्र थोड्याच दिवसांत त्याच्या अंगावर मोठ्या प्रमाणात कर्ज झाले. त्याच्याकडे असलेल्या क्रेडिट कार्डचे पैसेही थकले. अशाच पैशातून त्याने एक महागडी मोटरसायकलही खरेदी केली. अशातच पवईतील एका हॉटेलमध्ये मराठी वृत्तपत्र वाचत असताना त्याला घरफोड्या करण्याची क्‍लृप्ती सुचली. या क्‍लृप्तीतूनच त्याने एकट्यानेच पवई परिसरात तब्बल 31 घरे फोडली. सोने व रोख रक्कम चोरणारा राहुल दादर येथील काही ज्वेलर्सच्या दुकानांत चोरी केलेले सोने विकत होता. पवईत असलेल्या कॅनरा बॅंक सोसायटीत ऑगस्टमध्ये झालेल्या एका घरफोडीत त्याने क्रेडिट कार्ड चोरले होते. याच क्रेडिट कार्डाचा वापर करून, त्याने ऑर्बिट मॉलमध्ये हजारो रुपयांची शॉपिंग केली. याच क्रेडिट कार्डाच्या मदतीने पोलिस त्याच्यापर्यंत पोचले. त्याला पोलिसांनी 22 सप्टेंबर रोजी अटक केली. त्याच्याकडून आणखी पाच गुन्ह्यांत चोरलेली मालमत्ता हस्तगत करणे बाकी असल्याचे पवई पोलिस ठाण्याचे वरिष्ठ निरीक्षक आर. एन. रूपवते यांनी सांगितले.
------------------------------