रेव्ह पार्टीप्रकरणी "बॉम्बे 72 डिग्री'ला थर्ड?

नोटीस बजावणार ः परवाना रद्द होण्याची दाट शक्‍यता

सकाळ वृत्तसेवा
मुंबई, ता. 9 ः बार आणि रेस्टॉरंटचा परवाना असलेल्या जुहूच्या "बॉम्बे 72 डिग्री' हॉटेलमध्ये सुरू असलेली रेव्ह पार्टी अमली पदार्थविरोधी पथकाने उधळल्यानंतर या बारच्या मालकाला परवाना रद्द करण्यासंबंधी "कारणे दाखवा' नोटीस बजावण्यात येणार आहे. बारमालकाकडून याबाबत योग्य स्पष्टीकरण न आल्यास हा परवाना रद्द होईल. अमली पदार्थविरोधी पथकाच्या अहवालानंतर ही कारवाई होणार असल्याचे वरिष्ठ पोलिस अधिकाऱ्यांनी सांगितले.
अमली पदार्थविरोधी पथकाने 4 ऑक्‍टोबरच्या मध्यरात्री जुहूच्या बॉम्बे 72 डिग्री पबवर छापा घालून तेथे सुरू असलेली रेव्ह पार्टी उधळली. या वेळी पोलिसांनी राजकीय व सिनेसृष्टीतील बड्या धेंडांच्या 231 मुलांना ताब्यात घेतले, तर अमली पदार्थांची विक्री करणारे आठ जण व सहा आयोजकांना अटक केली.
या संपूर्ण प्रकरणाची वरिष्ठ पोलिस अधिकाऱ्यांनी गंभीर दखल घेतली आहे. तपासाअंती "बॉम्बे 72' हा पब नसून, त्याला फक्त बार आणि रेस्टॉरंट चालविण्याचाच परवाना पोलिसांनी दिल्याचे स्पष्ट झाले; मात्र सर्व सरकारी नियम धाब्यावर बसवून तेथे रेव्ह पार्टी झाली. या हॉटेलच्या परवान्याचे 2005 मध्ये नूतनीकरण करण्यात आले. रात्री उशिरापर्यंत बार सुरू ठेवल्यामुळे या ठिकाणी स्थानिक पोलिसांनी एकदा कारवाई केली होती. नंतर याच बारवर अमली पदार्थविरोधी पथकाने टाकलेल्या छाप्यात तेथे होणाऱ्या रेव्ह पार्टीत मोठ्या प्रमाणावर अमली पदार्थांची विक्री होत असल्याचेही स्पष्ट झाल्याने स्थानिक पोलिसांच्या भूमिकेबाबत प्रश्‍नचिन्ह निर्माण झाले आहे. या बारवर अमली पदार्थविरोधी पथकाने केलेल्या कारवाईनंतर पुढील कारवाईसाठीचा अहवाल पोलिस आयुक्तांकडे जाईल. या बारने त्यांना दिलेल्या परवान्यानुसार नियमांचे उल्लंघन केल्यामुळे त्यांच्यावर परवाना रद्द करण्याची कारवाई का केली जाऊ नये, याबाबत "कारणे दाखवा' नोटीस दिली जाईल. या नोटिशीला योग्य ते उत्तर न मिळाल्यास या बारचा परवाना रद्द होईल, अशी माहिती पोलिस उपायुक्त (मुख्यालय) विजयसिंह जाधव यांनी दिली. अमली पदार्थविरोधी पथकाच्या अहवालानंतर ही नोटीस पाठविण्यात येणार असल्याचेही जाधव या वेळी म्हणाले.
....