मुंबई, ता. 30 ः मालेगाव येथे झालेल्या बॉम्बस्फोटानंतर या प्रकरणाचा तपास दहशतवादविरोधी पथकाकडे देण्यात आला असून सहपोलिस आयुक्त हेमंत करकरे यांच्या नेतृत्वाखाली एक तुकडी मालेगाव येथे गेल्याची माहिती या पथकाचे अतिरिक्त आयुक्त परमबीर सिंग यांनी दिली.
मालेगावच्या अंजुमन चौकात काल रात्री झालेल्या बॉम्बस्फोटात चार जण ठार; तर शंभरहून अधिक जखमी झाले. सुरुवातीला हा स्फोट सिलिंडरचा असल्याचे सांगण्यात आले होते. मात्र प्रत्यक्षात हा बॉम्बस्फोट असल्याचे स्पष्ट झाले. या स्फोटानंतर घटनास्थळावर स्थानिक पोलिसांसह दहशतवादविरोधी पथकाची तुकडीही रवाना झाली होती. आज सकाळी या पथकाचे सहपोलिस आयुक्त हेमंत करकरे मालेगाव येथे दाखल झाले आहेत. सकाळी उपमुख्यमंत्री आर. आर. पाटील यांनी मालेगावला भेट देऊन या स्फोटाचा तपास दहशतवादविरोधी पथकाकडे सोपविण्याचा निर्णय घेतला आहे. सध्या या स्फोटाची अतिशय प्राथमिक चौकशी सुरू असल्याची माहिती या पथकाचे अतिरिक्त पोलिस आयुक्त परमबीर सिंग यांनी दिली.
No comments:
Post a Comment