... त्यामुळे दिल्ली स्फोटांच्या ई-मेलला झाला विलंब

राकेश मारिया ः गणेशोत्सवाच्या गर्दीमुळे "ते' पोचू शकले नाहीत

सकाळ वृत्तसेवा
मुंबई, ता. 10 ः बॉम्बस्फोटांच्या धमकीचे ई-मेल पाठविण्याकरिता पुण्याहून निघणारे "इंडियन मुजाहिदीन'च्या मीडिया विंग मधील अतिरेकी त्यांना दिलेल्या वेळेत ई-मेल पाठविण्यात कसलीच अडचण येऊ नये, यासाठी सोबत दोन लॅपटॉप घेऊन येत. मात्र, दिल्ली बॉम्बस्फोटांच्या धमकीचा मजकूर असलेला ई-मेल पाठविताना या अतिरेक्‍यांना गणेशोत्सवात भाविकांच्या झालेल्या गर्दीमुळे उशीर झाला होता, अशी माहिती गुन्हे शाखेचे सहपोलिस आयुक्त राकेश मारिया आज पत्रकारांना दिली.
"इंडियन मुजाहिदीन'च्या अटक केलेल्या अतिरेक्‍यांपैकी मीडिया विंगमध्ये असलेला संगणकतज्ज्ञ मोहम्मद मन्सूर पीरभॉय व त्याचे तिघे साथीदार बॉम्बस्फोटांपूर्वी धमकीचे ई-मेल पाठवीत. इंटरनेट राऊटरच्या मदतीने वायफाय कनेक्‍शनवरून हे धमकीचे ई-मेल पाठविले जात. 26 जुलै रोजी अहमदाबाद बॉम्बस्फोटांचा ई-मेल सानपाड्याच्या गुनानी इमारतीखाली उभे राहून पाठविणारा पीरभॉय दिल्ली बॉम्बस्फोट मालिकांच्या वेळी ई-मेल पाठविण्याकरिता त्याच्या तीन साथीदारांसोबत पुण्याहून निघाला होता. चेंबूरच्या "कमानी इंडस्ट्रीज'च्या कॉम्प्युटरवरून हा ई-मेल इंटरनेट राऊटरच्या मदतीने वायफाय जोडणीद्वारे पाठविला जाणार होता. सायंकाळी 6 वाजून 20 मिनिटांनी हा ई-मेल पाठविण्याची जबाबदारी त्यांच्यावर होती; मात्र त्या दिवशी चेंबूर परिसरात गणेशभक्तांची मोठ्या प्रमाणात गर्दी असल्याने कमानी इंडस्ट्रीजच्या कार्यालयाजवळ जायला त्यांना बराच वेळ लागला. परिणामी दिल्लीत बॉम्बस्फोट सुरू असताना हे ई-मेल पाठविले गेल्याचे राकेश मारिया यांनी सांगितले.
बॉम्बस्फोट घडविण्यासाठी लागणारी स्फोटके रियाज भटकळचा विश्‍वासू साथीदार सय्यद नौशाद अतिरेक्‍यांना पुरवीत असे. हैदराबाद वगळता अहमदाबाद, सुरत व दिल्ली येथे झालेल्या स्फोटांसाठी लागणारी स्फोटके घेण्यासाठी अतिरेकी मंगळूर येथे गेले होते, अशी माहितीही मारिया यांनी या वेळी दिली.
---------------------

चौकट
------
पुण्याचा निष्णात संगणकतज्ज्ञ मोहम्मद मन्सूर पीरभॉय याला जेहादी प्रशिक्षण देण्याचे काम 2004 मध्ये सुरू झाले. एका अरेबिक क्‍लासमध्ये कुराणचा अभ्यास करण्यासाठी जाणाऱ्या पीरभॉयला अतिरेकी कारवाया करण्यास प्रवृत्त करण्याकरिता आसिफ बशीर शेख प्रयत्नात होता. 2006 मध्ये पीरभॉयने या कारवायांत सहभाग घेण्यात रस दाखविल्यानंतरच त्याला रियाज भटकळकडे प्रशिक्षणासाठी पाठविण्यात आले.