आठ संशयित अतिरेक्‍यांना अटक

कर्नाटकमध्ये छापे ः सर्व जण "इंडियन मुजाहिदीन'चे

सकाळ वृत्तसेवा
मुंबई, ता. 5 ः देशभरातील बॉम्बस्फोटांना जबाबदार असणाऱ्या इंडियन मुजाहिदीन संघटनेशी संबंधित आठ संशयित अतिरेक्‍यांना गुन्हे शाखेच्या पोलिसांनी बेंगळूरु येथून अटक केली. रात्री उशिरा मुंबईत आणलेल्या या अतिरेक्‍यांना आज दुपारी किल्ला न्यायालयासमोर उभे करण्यात आले.
गुन्हे शाखेच्या पोलिसांनी अटक केलेल्या या अतिरेक्‍यांमध्ये 11 जुलै 2006 रोजी उपनगरी गाड्यांत झालेल्या बॉम्बस्फोटांतील संशयित आरोपी मोहम्मद अली (वय 44) त्याचा मुलगा जावेद अली (20), अहमद बावा (33), सय्यद मोहम्मद नौशाद (25) व अन्य चार जणांचा समावेश आहे. मोहम्मद अलीचा अतिरेक्‍यांना प्रशिक्षण देण्यातील सहभाग स्पष्ट झाला आहे. अहमद बावा सुरतमध्ये बॉम्ब ठेवल्याप्रकरणी दोषी आढळला असून, सय्यदकडे अतिरेकी कारवायांसाठी स्फोटके पुरविण्याची जबाबदारी होती, अशी माहिती पुढे आली आहे.
जयपूर, बेंगळूरु, अहमदाबाद व दिल्लीसह गेल्या तीन वर्षांमध्ये देशभरात झालेल्या बॉम्बस्फोटांप्रकरणी गुन्हे शाखेच्या पोलिसांनी 24 सप्टेंबर रोजी पाच कुख्यात अतिरेक्‍यांना अटक केली. या अतिरेक्‍यांकडून मिळालेल्या माहितीवरून त्यांच्या अन्य साथीदारांचा शोध घेण्यासाठी गुन्हे शाखेच्या पोलिसांची सात पथके मुंबई, पुणे, बेंगळूरु व आझमगढ येथे स्थानिक पोलिसांसोबत छापे घालत होती. "इंडियन मुजाहिदीन'च्या पहिल्या फळीतील अतिरेकी रोशन खान ऊर्फ रियाज भटकळ याचे या अतिरेकी कारवायांवर नियंत्रण असते. मूळचा बेंगळूरुचा असलेला रियाज या स्फोटांसाठी स्फोटके व हवालाचा पैसा पुरवितो. रियाज त्याच्या मूळ गावी असल्याची माहिती अटक केलेल्या अतिरेक्‍यांच्या चौकशीतून मिळाल्यानंतर पोलिसांनी त्याच्या बेंगळूरु येथील घरावर छापा घातला. पोलिस मागावर असल्याचे कळल्यानंतर तो तेथून निसटला. गुन्हे शाखेचे अतिरिक्त पोलिस आयुक्त देवेन भारती स्वतः या छाप्याच्या वेळी कर्नाटक येथे होते. पोलिसांनी कर्नाटक येथील कारवाई काल रात्री संपविली. या कारवाईनंतर अटक केलेल्या आठही अतिरेक्‍यांना पोलिसांनी शनिवारी रात्री उशिरा मुंबईत आणले. आज दुपारी 3 वाजण्याच्या सुमारास या आरोपींना किल्ला न्यायालयात हजर करण्यात आले. याच वेळी गुन्हे शाखेच्या पोलिसांच्या आझमगढ व अन्य ठिकाणीही कारवाया सुरू असल्याची माहिती सूत्रांनी दिली.
---------------