मुंबईसह राज्यात "हाय ऍलर्ट'

गणपती विसर्जन ः मिरवणुकीतील प्रत्येक वाहनाची कसून तपासणी
सकाळ वृत्तसेवा
मुंबई, ता. 13 ः दिल्ली येथे झालेल्या बॉम्बस्फोट मालिकेनंतर मुंबईसह राज्यात "हाय ऍलर्ट' चा इशारा देण्यात आल्याची माहिती पोलिस आयुक्त हसन गफूर यांनी दिली. तसेच उद्या (ता. 14) विसर्जनासाठी जाणारे मोठे गणपती ट्रकवर ठेवल्यानंतर संपूर्ण ट्रकची बॉम्बशोधक पथकाकडून तपासणी करण्याच्या सूचनाही त्यांनी दिल्या आहेत.
गणपती विसर्जनाच्या मिरवणुकीसाठी जे मार्ग आखण्यात आले आहेत, तेथे अन्य कोणत्याही वाहनांना प्रवेश दिला जाणार नाही. तसेच विसर्जनासाठी जाणाऱ्या गणपतींवर भक्तांकडून हार व फुले भिरकावण्यास मनाई करण्यात आली आहे. शहरातील संवेदनशील ठिकाणांवर सुरक्षा व्यवस्था वाढविण्यात आली आहे. उद्या अकरा दिवसांच्या गणेशमूर्तींच्या विसर्जनासाठी लाखो भाविक समुद्रकिनारी असलेल्या चौपाट्यांवर गर्दी करतात. त्या पार्श्‍वभूमीवरही चोख पोलिस बंदोबस्त ठेवण्यात आल्याचे गफूर या वेळी म्हणाले.
दिल्लीत आज सायंकाळी पाच ठिकाणी झालेल्या स्फोटांत 20 जण ठार; तर 92 जखमी झाले. त्या पार्श्‍वभूमीवर आज मुंबईसह राज्यात अतिदक्षतेचा इशारा देण्यात आला. आजपासूनच शहरात दाखल होणाऱ्या प्रत्येक वाहनाची कसून चौकशी सुरू झाली असून, शहरात ठिकठिकाणी नाकाबंदी करण्यात आली आहे. शहरातील संवेदनशील ठिकाणे तसेच महत्त्वाच्या इमारतींभोवतीही कडक पहारा ठेवण्यात आला आहे. हॉटेल, लॉज, झोपडपट्‌टी परिसरात कोम्बिंग ऑपरेशन सुरू करण्यात आले आहे. त्यासाठी राज्य राखीव पोलिस दलाचीही अतिरिक्त कुमक मागविण्यात आल्याची माहितीही गफूर यांनी या वेळी दिली.
पोलिसांनी गणेशोत्सव मंडळांच्या स्वयंसेवकांनाही खास प्रशिक्षण दिले आहे. गर्दीच्या ठिकाणी संशयितांच्या हालचालींवर लक्ष ठेवण्यासाठी साध्या वेशातील तसेच सीआयडीचे पोलिस तैनात केले आहेत. याशिवाय खबरदारी म्हणून बॉम्बशोधक आणि विनाशक पथकही विसर्जनाच्या ठिकाणी ठेवण्यात येणार आहे. नागरिकांनी घाबरून जाऊ नये. तसेच अफवा पसरवू नयेत, असे आवाहनही पोलिस आयुक्तांनी केले आहे.