तौकिरच्या मागावर एटीएसचे अधिकारी

स्फोटांनंतरचा ई-मेल : चेंबूर, अंधेरीत छापे
सकाळ वृत्तसेवा
मुंबई, ता. 14 : दिल्ली बॉम्बस्फोट मालिकेचा ई-मेल चेंबूरच्या कामरान पॉवर कंट्रोल प्रायव्हेट लिमिटेड कंपनीतून पाठविण्यात आल्याचे स्पष्ट झाल्यानंतर आज सकाळपासून दहशतवाद विरोधी पथकाच्या पोलिसांनी चेंबूर व अंधेरीच्या मोगरापाडासह शहरात ठिकठिकाणी छापे घालून शोधमोहीम हाती घेतली. हा ई-मेल अब्दुल सुभान कुरेशी ऊर्फ तौकिर याने पाठविल्याचा संशय व्यक्त करून दहशतवाद विरोधी पथक त्याच्या मागावर असल्याची माहिती या पथकाचे अतिरिक्त आयुक्त परमबीर सिंग यांनी दिली.

गणेशमूर्तींच्या विसर्जन काळात कोणताही अनुचित प्रकार घडू नये याकरिता नागरिकांनी संशयास्पद हालचाली व वस्तूंवर लक्ष ठेऊन, त्याबाबतची माहिती तातडीने पोलिसांना कळवावी, असे आवाहन दहशतवाद विरोधी पथकाने एसएमएसद्वारे मुंबईकरांना केले होते. दिल्ली बॉम्बस्फोटांच्या धमकीचा ई-मेल काल सायंकाळी काही वृत्तवाहिन्यांना पाठविण्यात आला. "इंडियन मुजाहिदीन' या अतिरेकी संघटनेच्या नावे पाठविण्यात आलेला हा ई-मेल चेंबूरच्या कामरान पॉवर कंट्रोल कंपनीच्या कॉम्प्युटरवरून पाठविण्यात आला. एमटीएनएलच्या वायफाय इंटरनेट सुविधेचा वापर असलेल्या या कंपनीतील इंटरनेट राऊटरच्या मदतीने हा मेल पाठविण्यात आला असावा, अशी शक्‍यता वर्तविण्यात येत आहे.

कंपनीमालकाची चौकशी
दहशतवाद विराधी पथकाने कामरान कंपनीचे मालक के. एम. कामत व एन. के. कामत यांची दिवसभर चौकशी केली. कंपनीत फक्त दोनच कॉम्प्युटर असल्याने कामत यांनी घेतलेल्या वायफाय जोडणीबाबतही पोलिस साशंक आहेत. पोलिसांनी हे कॉम्प्युटर फॉरेन्सिक सायन्स लॅबमध्ये पाठविले आहेत. दहशतवाद विरोधी पथक सायबर क्राईम सेलचे पोलिस व खासगी कॉम्प्युटर एक्‍सपर्टची मदत घेत आहेत. कामत यांनी मात्र या प्रकरणात आपण निर्दोष असून, आपण तंत्रज्ञानाचे बळी ठरत असल्याची प्रतिक्रिया प्रसिद्धिमाध्यमांना दिली. अहमदाबाद येथे झालेल्या बॉम्बस्फोटांच्या पाच मिनिटांपूर्वी असाच ई-मेल सानपाड्याच्या गुनानी इमारतीत राहणाऱ्या केनेथ हेवूड या अमेरिकन नागरिकाच्या कॉम्प्युटरवरून पाठविण्यात आला होता. गुजरात पोलिसांच्या अटकेत असलेला अहमदाबाद स्फोटांचा मास्टरमाईंड अबू बशीरच्या जबानीत हा ई-मेल तौकिरनेच पाठविल्याची माहिती पुढे आली. माटुंग्याच्या खालसा महाविद्यालयातून पाठविण्यात आलेल्या धमकीच्या ई-मेलनंतर तौकिरचे वास्तव्य मुंबईतच असल्याचे स्पष्ट झाले होते. दिल्ली स्फोटांचा ई-मेल मुंबईतूनच पाठविण्यात आल्याने त्याचे मुंबईतील वास्तव्य अधोरेखित होत असल्याचे वरिष्ठ पोलिस अधिकाऱ्यांनी सांगितले.
----------------------------------------------