गणेशोत्सवात घातपाताचा कट होता; पण...

गणेशोत्सवात घातपाताचा कट होता; पण...
तपशील हाती ः प्रसिद्ध मंडळांची तिघा अतिरेक्‍यांकडून पाहणी

सकाळ वृत्तसेवा
मुंबई, ता. 25 ः गुन्हे शाखेच्या पोलिसांनी अटक केलेल्या इंडियन मुजाहिदीनच्या पाच अतिरेक्‍यांनी गणेशोत्सव काळात मुंबईत घातपात करण्याचा कट रचला होता, अशी महत्त्वपूर्ण माहिती उघडकीस आली आहे. त्या पार्श्‍वभूमीवर यातील तिघा अतिरेक्‍यांनी शहरातील प्रसिद्ध गणेशोत्सव मंडळांच्या मंडपांची पाहणी केली होती, अशी माहिती गुन्हे शाखेच्या वरिष्ठ अधिकाऱ्याने दिली.
दिल्ली व अहमदाबाद बॉम्बस्फोट प्रकरणात महत्त्वाचा सहभाग असलेल्या इंडियन मुजाहिदीनच्या अफजल उस्मानी, मोहम्मद सादीक शेख, मोहम्मद आरिफ शेख, मोहम्मद जाकिर शेख आणि मोहम्मद अन्सार शेख या कडव्या अतिरेक्‍यांना गुन्हे शाखेच्या पोलिसांनी अटक केली. गुन्हे शाखेच्या अधिकाऱ्यांनी केलेल्या या अतिरेक्‍यांच्या चौकशीत त्यांनी शहरात घातपात घडविण्यासाठी गणेशोत्सवाचा कालावधी निवडला होता अशी कबुली दिली आहे. गणेशोत्सव काळात लाखो भाविक दर्शनासाठी येत असल्याने शहरात अतिरेकी कारवाया करण्याचा त्यांचा इरादा होता; मात्र त्यांच्या या संभाव्य कारवाईची माहिती केंद्रीय गुप्तचर विभागाला कळल्याने त्यांनी मुंबई पोलिसांना याबाबत सतर्क राहण्याचा इशारा दिला होता. अतिरेक्‍यांनी प्रसिद्ध गणेशोत्सव मंडळांच्या मंडपांची पाहणी केल्याचे स्पष्ट होताच पोलिसांनी शहरात कडेकोट सुरक्षा व्यवस्था ठेवली. पोलिसांनी शहरात ठेवलेल्या चोख सुरक्षाव्यवस्थेमुळेच मुंबईत कार्यरत असलेल्या अतिरेक्‍यांच्या या गटाला आपले मनसुबे पूर्णत्वास नेता आले नाहीत. मुंबईचे पोलिस आयुक्त हसन गफूर यांनी हे अतिरेकी मुंबईत घातपात घडविणार होते याची माहिती यापूर्वीच दिली आहे.
गणेशोत्सव कालावधीतच या पाचही अतिरेक्‍यांना पकडण्यासाठी महत्त्वाचा दुवा ठरलेला अफजल मुतालिब उस्मानी गुन्हे शाखेच्या पोलिसांच्या जाळ्यात सापडला. देशभरातील चोरीच्या गाड्यांचा डिलर असलेल्या अफजल याने अहमदाबाद बॉम्बस्फोटांसाठी वापरण्यात आलेल्या चार गाड्या नवी मुंबईतून चोरल्या. इंडियन मुजाहिदीनचा संस्थापक सदस्य असलेल्या रोशन खानसोबत सुरुवातीला फजलू रहमान टोळीसाठी खंडणी मागण्याचे काम करणारा अफजल जानेवारी- 2007 मध्ये "मोक्का'खाली शिक्षा भोगून सुटला. त्यानंतर त्याने चोरीच्या गाड्यांची विक्री करण्याचा व्यवसाय सुरू केला. अहमदाबाद स्फोटात वापरलेल्या गाड्या नवी मुंबईतून चोरल्याचे उघडकीस आल्यानंतर गुन्हे शाखेचे पोलिस गाड्या चोरणाऱ्या टोळ्यांच्या मागे लागले होते. त्यातच पोलिसांनी चोरीच्या गाड्या विकणाऱ्या राजू सोनी याला अटक केली. अहमदाबाद स्फोटांनंतर सव्वा महिन्याने सोनी याने अफजलने या गाड्या पुरविल्याचे सांगितल्यानंतर पोलिसांनी त्याला अटक केल्याचे सांगण्यात येते.