पाच अतिरेक्‍यांना मुसक्‍या ः स्फोटके आणि शस्त्रसाठा जप्त; सर्व इंडियन मुजाहिद

मुंबई पुन्हा बचावली

पाच अतिरेक्‍यांना मुसक्‍या ः स्फोटके आणि शस्त्रसाठा जप्त; सर्व इंडियन मुजाहिद

सकाळ वृत्तसेवा
मुंबई, ता. 24 ः शेकडो निरपराध नागरिकांचे बळी घेणाऱ्या बॉम्बस्फोटांत प्रत्यक्ष व अप्रत्यक्ष सहभाग असलेल्या इंडियन मुजाहिदीनच्या पाच अतिरेक्‍यांच्या मुसक्‍या आज गुन्हे शाखेच्या पोलिसांनी आवळल्या. या अतिरेक्‍यांमध्ये इंडियन मुजाहिदीनचा संस्थापक सदस्य असलेला आणि दिल्ली बॉम्बस्फोटांचा प्रमुख सूत्रधार असलेला महम्मद सादिक शेख व अहमदाबाद येथे बॉम्बस्फोट घडविण्यासाठी नवी मुंबईतून गाड्या चोरणारा अफजल उस्मानी यांचा समावेश आहे. या अतिरेक्‍यांना लष्कर-ए-तोयबा व हुजी या अतिरेकी संघटनांकडून प्रशिक्षण मिळाले असून त्यांच्यावर पाकिस्तानातून नियंत्रण ठेवण्यात येत असल्याची माहिती मुंबईचे पोलिस आयुक्त हसन गफूर यांनी पत्रकार परिषदेत दिली. या अतिरेक्‍यांकडून पोलिसांनी मोठ्या प्रमाणावर स्फोटके व शस्त्रसाठा हस्तगत केला आहे. मुंबईतही घातपात घडविण्याचा या दहशतवाद्यांचा कट उधळल्याची माहितीही गफूर यांनी यावेळी दिली.

अफजल मुतालिब शेख (32, रा. आझमगढ), मोहम्मद सादिक शेख (31,रा. चिताकॅम्प), मोहम्मद अरिफ शेख (38,रा. मुंब्रा), मोहम्मद झाकिर शेख (28, रा. भिवंडी) व मोहम्मद अन्सार शेख (31, रा. चिताकॅम्प) अशी या अतिरेक्‍यांची नावे आहेत. त्यांच्याकडून पोलिसांनी दहा किलो जिलेटिन, अमोनियम नायट्रेट, पंधरा डिटोनेटर, आठ किलो बॉल बेअरिंग, बॉम्ब तयार करण्यासाठी लागणारे सर्किट, एक सबमशिन गन, दोन रिव्हॉल्व्हर, कार्बाईनची तीस काडतुसे, रिव्हॉलव्हरची आठ काडतुसे असा शस्त्रसाठा जप्त केला आहे. हे पाचही जण मूळचे आझमगढचे असून त्यातील तिघे संजरपूर गावचे राहणारे आहेत. अटक केलेल्या आरोपींपैकी अफजल याने अहमदाबादमध्ये बॉम्बस्फोट घडविण्यासाठी नवी मुंबईतून चार गाड्या चोरल्या होत्या. सुरत येथील रुग्णालय व बाजारात स्फोट घडविण्यासाठी दोन गाड्यांत त्यानेच बॉम्ब ठेवले होते.

इंडियन मुजाहिदीन संघटनेच्या तिघा जणांच्या "थिंकटॅंक'पैकी एक असलेला मोहम्मद सादिक शेख मुंबईतील एका प्रसिद्ध इलेक्‍ट्रॉनिक कंपनीत प्रोग्राम इंजिनीयर म्हणून काम करीत होता. अतिरेकी प्रशिक्षणासाठी तो दोन वेळा देशाबाहेर गेला होता.
बॉम्ब तयार करण्यासाठी लागणारे इलेक्‍ट्रिक सर्किट बनविण्यात निष्णात असलेला महम्मद आरिफ शेख हा अतिरेकी इलेक्‍ट्रिशनचे काम करीत होता. इंडियन मुजाहिदीनने देशभरात घडविलेल्या बॉम्बस्फोटांसाठी त्यानेच सर्किट तयार केले होते. भिवंडीत स्थायिक झालेला मोहम्मद झाकिर शेख भंगार विक्रीचा व्यवसाय करीत होता. सुरतमधील अतिरेकी कारवायांतील त्याचा सहभाग उघडकीस आला आहे. महम्मद सादिकचा जवळचा साथीदार असलेला मोहम्मद अन्सार शेख सॉफ्टवेअर इंजिनीयर आहे. त्यानेही परदेशात जाऊन अतिरेकी प्रशिक्षण घेतले आहे. दिल्लीत 13 सप्टेंबर रोजी झालेल्या बॉम्बस्फोट मालिकेनंतर पोलिस चकमकीत मारला गेलेला आतिफ आज अटक केलेला मोहम्मद सादिकच्या इशाऱ्याबरहुकुम अतिरेकी कारवाया करीत होता. कटांसाठी गाड्या मिळवणे, कट आखणे तसेच अतिरेक्‍यांना जबाबदाऱ्यांचे वाटप करण्याची जबाबदारी सादिकवर होती.
"सिमी' संघटनेशी संबंधित असलेल्या या अतिरेक्‍यांनी देशात घातपात घडविण्यासाठी इंडियन मुजाहिदीन नावाची संघटना सुरू केली आहे. या आरोपींचे "सिमी'चा सक्रिय कार्यकर्ता सफदर नागोरी याच्याशीही संबंध उघडकीस आले असून इंडियन मुजाहिदीनच्या "थिंक टॅंक'मधील आणखी एक प्रमुख रोशन खान याचा पोलिस शोध घेत आहेत. गेल्या काही दिवसांत मुंबईत घातपात घडविण्याचा ई-मेल पोलिसांना आला होता. या अतिरेक्‍यांच्या अटकेनंतर मुंबईत होणारा संभाव्य घातपात टळल्याची कबुली गफूर यांनी यावेळी दिली.
या अतिरेक्‍यांची पाळेमुळे पाकिस्तानात असून आयएसआयशी त्यांचा संबंध आहे. मुंबईत 11 जुलै 2006 रोजी झालेले बॉम्बस्फोट, जयपूर, बंगळूरू, अहमदाबाद, दिल्ली येथे झालेल्या बॉम्बस्फोट मालिकांसह वारणसीतील संकटमोचन मंदिर, काशीविश्‍वेश्‍वर मंदिर, वाराणसी रेल्वेस्थानक, फैजाबाद, गोरखपूर, हैदराबाद येथील स्फोटांतही या अतिरेक्‍यांचा सहभाग स्पष्ट झाल्याची माहिती गफूर यांनी दिली.

पोलिसांना पाच लाखांचे बक्षीस
गुन्हे शाखेचे सह पोलिस आयुक्त राकेश मारिया यांच्या नेतृत्वाखालील पथकाने केलेल्या या कामगिरीबाबत उपमुख्यमंत्री आर. आर. पाटील यांनी या पथकाला पाच लाख रुपयांचे बक्षीस जाहीर केले आहे. या अतिरेक्‍यांना 7 ऑक्‍टोबरपर्यंत पोलिस कोठडीचे आदेश देण्यात आले आहेत.