मृत्यूचा खेळ सुरु होईपर्यंत तो गुजरातच्या हद्दीतून बाहेर पडला होता...

ज्ञानेश चव्हाण /सकाळ वृत्तसेवा
मुंबई, ता. 25 ः इंडियन मुजाहिदीनच्या अतिरेक्‍यांपर्यंत पोहचण्यास महत्वपुर्ण दुवा ठरलेला कुख्यात अतिरेकी अफजल उस्मानी याने त्याच्या दोन साथीदारांसोबत स्फोट घडविण्यासाठी नेलेल्या गाड्या अहमदाबाद येथील रुग्णालय व बाजारात उभ्या केल्या. 42 निष्पापांचे बळी घेण्यास तसेच 183 जणांना जखमी करण्यास "मृत्युदूत' ठरलेल्या या चारही गाड्या त्याने अवघ्या एक लाख साठ हजार रुपयांना अतिरेक्‍यांना विकल्याची माहिती उघडकीस आली आहे. अहमदाबादमध्ये बॉम्बस्फोट झाले त्यादिवशी सायंकाळी साडेचार वाजताच्या राजधानी एक्‍सप्रेसने गुजरातहून मुंबईला येण्यासाठी तो निघाला. सायंकाळी साडेसहा वाजल्यापासून अहमदबादमध्ये मृत्युचा खेळ सुरु होईपर्यंत तो गुजरातच्या हद्दीतून सहीसलामत बाहेर पडला होता.

मुळचा महू जिल्ह्यातील ढिलाई फिरोजपुर गावचा अफजल वयाच्या आठव्या वर्षांपासून मुंबईत वास्तव्याला आहे. त्याच्या वडिलांचा वांद्रे येथे हॉटेल व्यवसाय आहे. त्याच्या हॉटेलवर नेहमी येणारा रोशन खान "आरएन' या टोळीसाठी काम करीत होता. अफजलचा 2002 मध्ये रोशनशी संपर्क आल्यांनंतर त्याच्यासोबत अफजलने शहरात खंडण्या मागायला सुरवात केली. त्याच्यावर आतापर्यंत नऊ गंभीर गुन्हे दाखल आहेत. 2005 मध्ये ओशिवरा येथे केलेल्या गोळीबारानंतर त्याला मोक्काखाली शिक्षा झाली. शिक्षा भोगून बाहेर पडलेल्या अफजलने नंतर पुन्हा रोशन खान सोबत संधांन साधले होते. तोपर्यंत रोशन इंडियन मुजाहिदीनच्या "थिंक टॅंक'पैकी एक झाला होता. तर अफजलने देशभरात चोरीच्या गाड्यांची विक्री करायला सुरवात केली. रोशनच्याच सांगण्यावरून अफजलने अहमदाबाद स्फोटांसाठी नवी मुंबईतून सीएनजी किट असलेल्या गाड्या चोरल्या. 10 व 16 जुलै रोजी प्रत्येकी दोन अशा चार गाड्या मुंबई- अहमदाबाद राजमार्गाने त्याने गुजरात मध्ये पोहचविल्या. त्याच्याकडे दिलेल्या एका चिठ्ठीवर लिहिलेल्या मोबाईल क्रमांकावर संपर्क साधून तेथील व्यक्तीच्या ताब्यात या गाड्या त्याने दिल्या. मात्र नंतर स्फोटकांनी भरलेल्या या गाड्या रुग्णालय व बाजारात उभ्या करण्यासही त्यालाच सांगण्यात आल्याची माहिती गुन्हे शाखेच्या वरीष्ठ अधिकाऱ्याने दिली. अफजलचा 11 जुलै 2006 मध्ये झालेल्या उपनगरी रेल्वे स्फोटांतील आरोपी महम्मद अली याच्याशीही देखील संपर्क असल्याचे पोलिस तपासात उघडकीस आले आहे.

दिल्ली कनेक्‍शनचा शोध...
अहमदाबादमध्ये बॉम्बस्फोट झाल्यानंतर पोलिसांनी अहमदाबाद व सुरतमधून सर्व दुरध्वनींचे रेकॉर्डस शोधले. स्फोटांच्या कालावधीत मोबाईलवरुन झालेल्या काही संशयास्पद मोबाईल क्रमांकांचा पोलिस शोध घेत होते. संभाषणानंतर त्यातील काही मोबाईलचे सिम कार्ड काढून टाकल्याचे पोलिसांना कळाले. या मोबाईल फोनचे शेवटचे ठिकाण पोलिस शोधत होते. त्यांतील एक मोबाईल दिल्लीच्या जामिया परीसरातून असल्याचे स्पष्ट झाले होते. त्या माहितीवरुनच पोलिसांना दिल्लीत जामिया परीसराचा ठावठिकाणा लागल्याचे या अधिकाऱ्याने सांगितले.

अतिरेकी प्रशिक्षण
देशभरातील बॉम्बस्फोट मालिकांसाठी कारणीभूत ठरलेल्या पाचही अतिरेक्‍यांना पाकीस्तान व बांगलादेशात अतिरेकी कारवायांचे प्रशिक्षण पूर्ण मिळाले. पाकिस्तानात जाण्यासाठी ते दुबई ते इराण व पुढे पाकीस्तान येथे जात असल्याची माहिती अतिरीक्त पोलिस आयुक्त देवेन भारती यांनी दिली.पाकीस्तानात असलेला आमिर रझाक त्यांच्यावर नियंत्रण ठेवत असल्याची माहितीही भारती यांनी दिली.
....