स्फोटांनंतरचा ई-मेल चेंबूरमधून

स्फोटांनंतरचा ई-मेल चेंबूरमधून

सकाळ वृत्तसेवा
मुंबई, ता. 13 ः दिल्ली बॉम्बस्फोट मालिकेनंतर या स्फोटांची जबाबदारी स्वीकारत असल्याबद्दलचा ई- मेल मुंबईतील चेंबूर परिसरातून पाठविण्यात आल्याचे स्पष्ट झाल्याने एकच खळबळ उडाली आहे; पोलिसांनी मात्र या ई-मेलची पूर्ण खातरजमा केल्याशिवाय वक्तव्य करणे योग्य नसल्याचे म्हटले आहे. सुरक्षिततेच्या पार्श्‍वभूमीवर आज तातडीने वरिष्ठ पोलिस अधिकाऱ्यांची बैठक घेण्यात आली. दहशतवादविरोधी पथकाचे (एटीएस) अधिकारी या प्रकरणी तपास करीत आहेत.

दिल्लीत झालेल्या बॉम्बस्फोट मालिकेची जबाबदारी इंडियन मजाहिदीन या अतिरेकी संघटनेने घेतली असल्याचे या ई-मेलवरून तरी आढळून आले आहे. या संघटनेने सायंकाळी 6 वाजून 24 मिनिटांनी काही वृत्तवाहिन्यांना हा ई- मेल पाठवून स्फोटांची जबाबदारी घेतली आहे. अहमदाबाद येथे झालेल्या बॉम्बस्फोटांपूर्वी पाठविण्यात आलेला ई-मेलदेखील नवी मुंबईच्या सानपाडा येथील गुनानी इमारतीत राहणाऱ्या केनेथ हेवूड या अमेरिकन नागरिकाच्या संगणकावरून पाठविल्याचे स्पष्ट झाले होते. इंटरनेट सुविधेच्या "राऊटर'च्या मदतीने हा मेल पाठविल्याचे तपासात निष्पन्न झाले. आज दिल्लीत झालेल्या स्फोटांचा ईमेलदेखील मुंबईतून पाठविल्याचे उघडकीस आले आहे. त्यामुळे दहशतवादी मुंबईत बसून योजना आखतात काय, असा प्रश्‍न निर्माण झाला आहे. त्यामुळे वरिष्ठ पोलिसही सतर्क झाले आहेत. या प्रकरणी आताच कोणतेही वक्तव्य करणे धाडसाचे ठरेल, असे वरिष्ठ पोलिस अधिकाऱ्यांनी सांगितले.
---------------
चौकट
---------

दिल्ली स्फोटांचा ई-मेल चेंबुर परीसरातून पाठविल्याची माहिती मिळाली असून पोलिस शोध माहिमेद्वारे हा ई-मेल पाठविणाऱ्याचा कसून शोध घेत असल्याची माहिती दहशतवाद विरोधी पथकाचे सहपोलिस आयुक्त हेमंत करकरे यांनी "सकाळ' ला दिली. ठोस माहिती हाती आल्याशिवाय या मेल बाबत आणखी काही सांगणे उचित ठरणार नाही असेही करकरे यावेळी म्हणाले