शाळांचा किलबिलाट बॉम्बच्या अफवेने थबकतो तेव्हा...

ज्ञानेश
-----



सकाळ वृत्तसेवा
मुंबई, ता. 22 ः दादरचे प्रसिद्ध शारदाश्रम विद्यालय... रविवारच्या सुट्टीचा मनसोक्त आनंद घेऊन आज सकाळी नेहमीप्रमाणे वर्गात हजर झालेल्या विद्यार्थ्यांचा किलबिलाट या परिसराला तसा नेहमीचाच. मधल्या सुट्टीनंतर शाळेचे वर्ग भरून तासिका नेहमीप्रमाणे सुरू झाल्या, तोच मुंबई पोलिसांची गाडी शाळेच्या आवारात येऊन थांबली. गाडीतून उतरलेल्या अधिकाऱ्यांनी लगबगीने मुख्याध्यापक व शिक्षकांना शाळेत बॉम्ब ठेवल्याचा दूरध्वनी आल्याची माहिती दिली. देशभरात होणाऱ्या दहशतवादी कारवायांच्या पार्श्‍वभूमीवर आलेल्या या बातमीने शिक्षकांच्याही पोटात भीतीचा गोळा आला. पोलिसांच्या सूचनेप्रमाणे विद्यार्थ्यांना काही क्षणातच शाळेबाहेर नेण्यात आले. बॉम्बशोधक पथक व श्‍वानपथकाने केलेल्या तपासणीत ही अफवा असल्याचे स्पष्ट झाले अन्‌ बराच वेळ तणावाखाली असलेले पोलिस, शिक्षक व मुलांना शाळेत सोडण्यासाठी आलेले पालक व विद्यार्थ्यांनीही सुटकेचा श्‍वास सोडला. असाच काहीसा प्रकार आज सांताक्रूझ व भोईवाडा येथील शाळांतही घडल्याने तेथील परिस्थितीही काही वेगळी नव्हती.
दादरचे शारदाश्रम विद्यालय बॉम्बने उडविण्यात येणार असल्याचा निनावी दूरध्वनी पोलिस नियंत्रण कक्षाला आज सकाळी 11 वाजून 40 मिनिटांनी आला. अतिरेकी संघटनांचे स्लीपर सेल मुंबईत कार्यरत असण्याची शक्‍यता असल्याने या दूरध्वनीची गंभीर दखल घेत पोलिसांनी तातडीने याबाबतची माहिती दादर पोलिसांना दिली. क्षणाचाही विलंब न लावता पोलिस बॉम्बशोधक व विनाशक तसेच श्‍वानपथकासोबत या शाळेत गेले. शिक्षकांच्या मदतीने त्यांनी तातडीने शाळेतील विद्यार्थ्यांना शाळेपासून लांब नेले. वर्ग सुरू असताना अचानक शाळा सोडल्याने विद्यार्थ्यांत एकच गोंगाट सुरू झाला. शाळा मध्येच सोडल्याने सुरुवातीला आनंदी झालेल्या काही लहानग्या विद्यार्थ्यांचा हा आनंद शाळेत बॉम्ब ठेवल्याची माहिती मिळताच कुठल्या कुठे मावळला. काहींनी तर चक्क रडायलाच सुरुवात केली. एव्हाना ही माहिती पालकांना समजली आणि त्यांनी शाळेकडे धाव घेतली. बघ्यांनीही प्रचंड गर्दी केली. एका तासाहून अधिक काळ केलेल्या तपासणीनंतर बॉम्बशोधक पथकाच्या अधिकाऱ्यांनी ही अफवा असल्याचे सांगताच तणावाखाली असलेले शिक्षक, पालक व विद्यार्थ्यांसह पोलिसांनीही सुटकेचा निश्‍वास सोडला.
यानंतर दुपारची शाळा नेहमीप्रमाणे भरल्याची माहिती दादर पोलिस ठाण्याचे वरिष्ठ पोलिस निरीक्षक मधुकर संख्ये यांनी दिली. असाच प्रकार दिवसभरात सांताक्रूझ पश्‍चिमेला असलेल्या सरस्वती हायस्कूल व भोईवाड्याच्या गुरुनानक हायस्कूलमध्येही घडला. या दोन्ही ठिकाणी गेलेल्या बॉम्बशोधक व श्‍वानपथकांना तेथे काहीही आक्षेपार्ह आढळले नसल्याची माहिती पोलिस नियंत्रण कक्षातील अधिकाऱ्यांनी दिली.