जगायचं असेल तर पंचवीस कोटी रुपये द्या, नाही तर...

अमिताभला धमकी ः राजस्थानातील चाहत्याला अटक

सकाळ वृत्तसेवा
मुंबई, ता. 29 ः तुमच्याकडे फक्त तीन दिवस आहेत... जगायचं असेल तर पंचवीस कोटी रुपये द्या, नाही तर... बिग बी अमिताभ बच्चन यांना 26 सप्टेंबरच्या भल्या सकाळी आलेला हा एसएमएस. या एसएमएसने खरे तर ते सुरुवातीला उडालेच. एसएमएस पाठविणाऱ्याचा मोबाईल क्रमांक न्याहाळल्यानंतर त्यांनी तातडीने गुन्हे शाखेच्या वरिष्ठ पोलिस अधिकाऱ्यांकडे तक्रार दिली. गुन्हे शाखेच्या पोलिसांनी मोबाईल कंपनीच्या मदतीने एसएमएस आलेल्या क्रमांकाच्या मोबाईलधारकाचा शोध लावला आणि राजस्थान येथे जाऊन तो पाठविणाऱ्या एका नवख्या कलाकाराच्या मुसक्‍या आवळल्या.
अभिषेक बच्चनची प्रमुख भूमिका असलेल्या "द्रोण' या चित्रपटात त्याच्यासाठी स्टंट सीन करणारा हा तरुण दिसायलाही हुबेहूब अभिषेकसारखाच आहे. अभिषेकच्या लग्नात प्रसिद्धिमाध्यमांचा ससेमिरा चुकविण्यासाठी याच तरुणाचा वापर करण्यात आला होता, अशी माहितीही समोर आली आहे.
देवीसिंग पद्मसिंग राजपुरोहित असे या तरुणाचे नाव आहे. राजस्थानी चित्रपटात काम करणारा हा पंचवीस वर्षीय कलाकार आणि अभिषेक बच्चन यांच्यात कमालीचे साम्य. त्यामुळेच दीड वर्षापूर्वी राजस्थानच्या जैसलमेर येथे झालेल्या "द्रोण' चित्रपटाच्या चित्रीकरणाच्या वेळी अभिषेकचे काही स्टंटसीन त्याला करायला मिळाले होते. जैसलमेर येथील चित्रीकरण संपल्यानंतर अभिषेक ऐश्‍वर्या रायसोबत लग्नाच्या बेडीत अडकला. या शाही लग्न सोहळ्याच्या वेळी अभिषेकच्या मागे प्रसिद्धिमाध्यमांचा ससेमिरा होता. प्रसिद्धिमाध्यमांच्या प्रतिनिधींना चुकविण्यासाठी देवीसिंगलाच लग्नाचा पोशाख घालून घोड्यावर बसवून बंगल्यातून बाहेर पाठविण्यात आले होते. परंतु चित्रपटांत भूमिका मिळविण्यासाठी मुंबईत आल्यानंतर देवीसिंगला म्हणावा तसा प्रतिसाद मिळत नव्हता.

भूमिका मिळविण्याच्या प्रयत्नांचा एक भाग म्हणून बच्चन कुटुंबीयांतील सदस्यांच्या वाढदिवसाला शुभेच्छापत्रे, पुष्पगुच्छ; तसेच मोबाईलवर एमएसमएस पाठवायला त्याने सुरुवात केली. अमिताभ यांच्या आईचे निधन झाल्यानंतरही त्याने एसएमएस पाठविला होता. अथक प्रयत्नांअंती कसलाच प्रतिसाद मिळत नाही हे पाहून त्याने थेट अमिताभ यांच्याकडेच खंडणी मागण्याचा प्रयत्न केला. अमिताभला एसएमएस करून पंचवीस कोटींची खंडणी मागणाऱ्या देवीसिंगला गुन्हे शाखेच्या पोलिसांनी राजस्थानच्या जालौर येथून अटक केल्याची माहिती गुन्हे शाखेचे सह पोलिस आयुक्त राकेश मारिया यांनी दिली. विवाहित असलेला देवीसिंग पाच मिठाईच्या दुकानांचा मालक आहे. अमिताभचा चांगला "फॅन' असलेला देवीसिंग एका एसएमएसमुळे चांगलाच अडचणीत आला आहे.