कुंपणाची भिंत कोसळून दोन बहिणींचा अंत

मलबार हिल येथील घटना; चार जखमी

मलबार हिल येथे न्यायाधीशांच्या निवासस्थानाला लागून असलेल्या "सर्व्हन्ट कॉर्टर्स'मधील घरावर कुंपणाची भिंत कोसळून एका कर्मचाऱ्याच्या दोन मुली मरण पावल्याची घटना आज सकाळी घडली. या घटनेत चार जण जखमी झाले असून, सेंट एलिझाबेथ रुग्णालयात त्यांच्यावर उपचार करून घरी पाठविण्यात आले आहे. आज पहाटे सव्वापाच वाजण्याच्या सुमारास ही दुर्घटना घडली.
मलबार येथील नारायण दाभोळकर मार्गावर असलेल्या "खटाव' व "रॉकी हिल' इमारतींमध्ये असलेली कुंपणाची 15 फूट उंचीची भिंत रॉकी हिल संकुलाच्या खोली क्रमांक 12 समोर असलेल्या पत्र्याच्या शेडवर कोसळली. या वेळी तात्याबा जाधव या कर्मचाऱ्याच्या रोहिणी (16) आणि पल्लवी (18) या दोन मुली मातीच्या ढिगाऱ्याखाली सापडून मृत्युमुखी पडल्या, तर तात्याबा, त्यांची पत्नी मंजुळा यांच्यासह त्यांच्या शेजारी राहणारे रामधीन सजू कनोजिया (52) आणि त्यांचा मुलगा सुरेंद्र (27) हे जखमी झाले. दोन्ही कुटुंबे झोपेत असताना घडलेल्या या दर्घटनेची माहिती याठिकाणी राहणाऱ्या अन्य कर्मचाऱ्यांनी अग्निशमन दल आणि स्थानिक पोलिसांना दिली. याठिकाणी काही क्षणातच पोहोचलेल्या अग्निशमन दलाच्या जवानांनी शोधकार्य सुरू केले. काही क्षणातच त्यांनी रोहिणी आणि पल्लवी या दोघींना मातीच्या ढिगाऱ्याखालून बाहेर काढले. रुग्णालयात उपचारासाठी दाखल करण्यापूर्वीच डॉक्‍टरांनी त्यांना मृत घोषित केले.
एका न्यायाधीशांच्या वाहनावर चालक म्हणून काम करणारे तात्याबा नुकतेच सेवानिवृत्त झाले होते. त्यांची पत्नीदेखील न्यायालयीन कर्मचारी आहे. रोहिणी नुकतीच दहावीची परीक्षा उत्तीर्ण झाली होती, तर मोठी मुलगी पल्लवी एका खासगी कंपनीत नोकरी करीत होती, अशी माहिती परिमंडळ-2 चे पोलिस उपायुक्त संजय मोहिते यांनी दिली. या दुर्घटनेत जखमी झालेल्या चौघांवर सेंट एलिझाबेथ रुग्णालयात उपचार केल्यानंतर त्यांना घरी पाठविण्यात आल्याचेही त्यांनी सांगितले.
या दुर्घटनेला जबाबदार धरून मलबार हिल पोलिस ठाण्यात खटाव कंडोमिनिअम इमारतीच्या संबंधितांवर गुन्हा दाखल करण्यात आल्याची माहिती मलबार हिल पोलिसांनी दिली.

(sakaal, 6th july)