पुजारी टोळीचा भुजंग अण्णा चकमकीत ठार

मुंबई : हेमंत पुजारी टोळीचा शार्पशूटर सुभाष शेट्टी ऊर्फ भुजंग अण्णा याला गुन्हे शाखेच्या युनिट-11च्या पोलिसांनी बोरिवली येथे चकमकीत ठार केले. त्याच्यावर खंडणी, दरोडे, हत्या आणि हत्येचा प्रयत्न अशा गंभीर गुन्ह्यांची नोद आहे. पोलिसांनी घटनास्थळावरून परदेशी बनावटीची दोन रिव्हॉल्व्हर आणि काडतुसे हस्तगत केली आहेत.
बोरिवली पश्‍चिमेला चिकूवाडी येथील लिंक रोडवर सायंकाळी साडेचार वाजण्याच्या सुमारास ही चकमक झाली. हेमंत पुजारी टोळीचा शार्पशूटर असलेला सुभाष शेट्टी एका हॉटेल व्यावसायिकाचा खून करण्यासाठी येणार असल्याची माहिती या युनिटचे वरिष्ठ पोलिस निरीक्षक फिरोज पटेल आणि त्यांच्या पथकाला मिळाली. त्यानुसार पोलिसांनी या ठिकाणी सापळा रचला. सायंकाळी साडेचारच्या सुमारास सुभाष त्याच्या साथीदारासोबत काळ्या रंगाच्या यामाहा मोटरसायकलवरून आला. आधीच सापळा रचून बसलेल्या पोलिसांनी त्याला शरण येण्यास सांगितले; मात्र त्याने स्वतःकडे असलेल्या रिव्हॉल्व्हरमधून पोलिसांवर सहा गोळ्या झाडल्या. या वेळी पोलिसांनी स्वसंरक्षणार्थ केलेल्या गोळीबारात सुभाष शेट्टी जखमी झाला. सुभाष खाली पडल्याचे पाहताच त्याचा साथीदार मोटरसायकलवरून पळून गेला. सुभाष शेट्टीला भगवती रुग्णालयात दाखल करण्यापूर्वीच तो मरण पावल्याची माहिती वरिष्ठ पोलिस निरीक्षक फिरोज पटेल यांनी दिली.
मुंबईतील हॉटेलमालकांवर हेमंत पुजारी टोळीची जरब बसविण्यात यशस्वी झालेला सुभाष शेट्टी बॅंक दरोडे, खंडणी, खून, खुनाचे प्रयत्न या गुन्ह्यांत पोलिसांना हवा होता. मुंबईतील तिघा हॉटेल व्यावसायिकांवर त्याने खंडणीसाठी गोळीबार केला होता. गेल्या वर्षी मिरा रोड येथील नवरंग बारचा मालक सुदाम शेट्टी याच्यावर गोळीबार करताना त्याचा साथीदार सुनील शेट्टी याला पोलिसांनी अटक केली होती. तेव्हापासून शेट्टी फरार होता.


(sakal,19 feb )