कसाबच्या ओळख परेडला 25 जणांची हजेरी

राकेश मारिया : सर्वसामान्य नागरिकांचाही सहभाग

सकाळ वृत्तसेवा
मुंबई, ता. 28 ः मुंबई हल्लाप्रकरणी पोलिसांनी पकडलेला अतिरेकी मोहम्मद अजमल कसाब याची आर्थर रोड तुरुंगात आज दुसऱ्या दिवशीही ओळख परेड घेण्यात आली. रेल्वे अधिकारी व कर्मचाऱ्यांसह सामान्य मुंबईकरही या ओळख परेडमध्ये सहभागी झाले होते. कसाबच्या ओळख परेडची प्रक्रिया आज संपली. सुमारे 25 जण या ओळख परेडला हजर होते, अशी माहिती गुन्हे शाखेचे सह पोलिस आयुक्त राकेश मारिया यांनी दिली.

26 नोव्हेंबरला मुंबईवर झालेल्या हल्ल्याप्रकरणी अतिरेकी महम्मद अजमल कसाब याची ओळख परेड घेण्यात आली. सध्या तीन गुन्ह्यांत अटकेत असलेल्या कसाबला हेमंत करकरे, अशोक कामटे आणि विजय साळसकर या तिघा वरिष्ठ अधिकाऱ्यांच्या हत्येप्रकरणी दोन दिवसांची न्यायालयीन कोठडी देण्यात आली आहे. आर्थर रोड तुरुंगात कालपासून सुरू झालेल्या कसाबच्या ओळख परेडमध्ये 25 हून अधिक साक्षीदारांनी त्याची ओळख पटविली. 26 नोव्हेंबरला स्कोडा गाडीतून गिरगाव चौपाटीकडे जाणाऱ्या कसाब आणि त्याचा साथीदार इस्माईल खान यांच्याशी डी. बी. मार्ग पोलिसांची चकमक उडाली. या चकमकीत इस्माईल खान ठार झाला; तर कसाबला पोलिसांनी जिवंत पकडले. डी. बी. मार्ग पोलिस ठाण्याचे कर्मचारीही काल या ओळख परेडला उपस्थित होते. याशिवाय स्कोडा गाडीचा मालक एस. आर. अरासा, पोलिस कॉन्स्टेबल अरुण जाधव, वैद्यकीय शिक्षण विभागाचे प्रधान सचिव भूषण गगराणी यांच्या गाडीचे चालक मारुती माधवराव फड यांनीदेखील कसाबला ओळखले.

आज सकाळी आर्थर रोड तुरुंगात रेल्वे सुरक्षा बल व रेल्वे पोलिस दलातील अधिकारी व कर्मचाऱ्यांना ओळख परेडकरिता बोलावण्यात आले. आर्थर रोड तुरुंगात कसाबला कडेकोट सुरक्षा व्यवस्थेत ठेवण्यात आले आहे. ओळख परेडमध्ये सहभागी होणाऱ्यांत मुंबई पोलिस दलातील अधिकारी व कर्मचारी, रेल्वे पोलिस, रेल्वे गार्ड, वृत्तपत्रांचे छायाचित्रकार व सामान्य नागरिक होते. कसाबची ओळख परेड आज सायंकाळी संपल्यानंतर त्याला मुंबई पोलिसांच्या गुन्हे शाखेने पुन्हा ताब्यात घेतले.