दहशतवाद्यांचा मुंबई विमानतळावर हल्ला करण्याचाही कट

पाकिस्तानात आखणी ः फहीम अन्सारीची कबुली

सकाळ वृत्तसेवा
मुंबई, ता. 21 ः मुंबईवर अतिरेकी हल्ला करणाऱ्या दहशतवाद्यांचा मुंबई विमानतळावर हल्ला करण्याचाही कट होता; मात्र हा कट अंमलात आणणे अत्यंत जिकिरीचे असल्याने तो मागे पडल्याची धक्कादायक माहिती उत्तर प्रदेश टास्क फोर्सच्या कस्टडीतून मुंबईत आणलेल्या लष्कर-ए-तैयबाचा अतिरेकी फहीम अन्सारी याने त्याच्या चौकशीत दहशतवादविरोधी पथकाला दिली. मुंबईवरील हल्ल्यासंबंधीचा कट वर्षभरापूर्वीच पाकिस्तानमध्ये शिजल्याची कबुलीही त्याने दिल्याचे समजते.

26 नोव्हेंबरला झालेल्या अतिरेकी हल्ल्यातील सहभागासंबंधी चौकशी करण्यासाठी उत्तर प्रदेश पोलिसांच्या कस्टडीत असलेले अतिरेकी फहीम अन्सारी आणि सबाउद्दीन अहमद यांना पोलिसांनी मुंबईत आणले. मुंबई हल्ल्याच्या पार्श्‍वभूमीवर चौकशी सुरू असताना फहीमने हा कट मार्च- 2007 मध्ये आखण्यात आल्याचे सांगितले. या वेळी तो पहिल्यांदा लष्कर-ए-तैयबाचा कमांडर आणि मुंबई हल्ल्याचा मास्टरमाईंड झाकी उर रहमान लक्वी व युसूफ मुझम्मील यांना पहिल्यांदा भेटला होता. 26 नोव्हेंबरला मुंबईवर हल्ला करणाऱ्या लष्कर-ए-तैयबाच्या हिटलिस्टवर हॉटेल ताज आणि ओबेरॉय यांच्याशिवाय मुंबई विमानतळदेखील होते. विमानतळाचा रनवे तसेच परदेशी जाणाऱ्या विमानांना प्रामुख्याने लक्ष्य केले जाणार होते. त्यासाठी फहीमने पाहणीदेखील केली होती. मात्र विमानतळावरील हल्ल्याचा कट जिकिरीचा असल्याने तो फसल्याचेही फहीमने त्याच्या चौकशीत सांगितल्याचे समजते.
फेब्रुवारी महिन्यात रामपूरच्या सीआरपीएफच्या तळावर गोळीबार केल्याप्रकरणी अटकेत असलेल्या फहीम अन्सारीकडून पोलिसांना मुंबईतील प्रमुख ठिकाणे, त्यांची छायाचित्रे व व्हिडीओ क्‍लिप्स; तसेच नकाशे मिळाले होते. यावेळी त्याच्या चौकशीत मुंबईवर हल्ल्याचा कट उघडकीस आला होता. लष्कर-ए-तैयबाचा कडवा अतिरेकी असलेल्या फहीमने लष्करच्या कमांडरना मुंबईसंबंधी पुरविलेल्या इथ्यंभूत माहितीमुळेच 26 नोव्हेंबरला हल्ला करताना अतिरेक्‍यांना कसलीच अडचण आली नाही. फहीम याने त्याच्याकडे असलेल्या महत्त्वपूर्ण माहितीची सीडी बनवून त्याचा साथीदार सबाऊद्दीन यांच्याकरवी ती लष्कर-ए-तैयबाला पुरविल्याचे पोलिसांचे म्हणणे आहे.