कसाबकडून महत्त्वाची माहिती मिळविण्यात एफबीआयला यश

नऊ तास चौकशी ः झाकी उर रहमानसह अन्य कमांडरची नावे उघड

सकाळ वृत्तसेवा
मुंबई, ता. 21 ः मुंबई हल्ल्याप्रकरणी पोलिसांच्या हाती लागलेला एकमेव जिवंत अतिरेकी मोहम्मद अजमल कसाब याची अमेरिकेच्या फेडरल ब्युरो ऑफ इन्व्हेस्टिगेशन (एफबीआय) च्या पथकाने नऊ तास चौकशी केली. या चौकशीत मुंबई हल्ल्याच्या कटासंबंधी तसेच त्याला लष्कर ए तैयबाकडून मिळालेल्या प्रशिक्षणासंबंधीची माहिती एफबीआयच्या पथकाने मिळविल्याचे सांगण्यात येते.

26 नोव्हेंबरला मुंबईवर झालेल्या अतिरेकी हल्ल्यात अतिरेक्‍यांच्या गोळीबारात ठार झालेल्यांत सहा अमेरिकी नागरिकांचा समावेश आहे. अतिरेकी हल्ल्यानंतर या घटनेच्या चौकशीसाठी 1 डिसेंबरला एफबीआयचे पथक मुंबईत दाखल झाले आहे. तीन आठवड्यांच्या तपासकार्यानंतर पहिल्यांदाच या पथकाला मोहम्मद अजमल कसाब याची चौकशी करण्याची संधी देण्यात आली. त्यानुसार एफबीआयच्या पथकाने त्याची तब्बल नऊ तास सतत चौकशी केली. पाकिस्तानातील उकारा येथे राहणाऱ्या कसाबसंबंधीची इत्यंभूत माहिती या पथकाने मिळविली. त्याच्या चौकशीच्या वेळी एफबीआयच्या पथकासोबत गुन्हे शाखेचे पोलिसदेखील उपस्थित होते. जिहादी प्रशिक्षण देणाऱ्या लष्कर ए तैयबाचा प्रमुख हाफीज महम्मद सईद, हल्ल्याचा मास्टरमाईंड झाकी उर रहमान याच्यासह अन्य कमांडरची नावे कसाबने या पथकाला सांगितली. काश्‍मीर आणि भारताच्या अन्य भागात मुस्लिमांवर होणाऱ्या अत्याचाराच्या सीडी दाखवून तसेच प्रक्षोभक भाषणे देऊन अतिरेकी कारवायांकरिता "लष्कर'च्या कमांडरनी त्याला कशा प्रकारे उद्युक्त केले याचीही माहिती त्याने दिली. या वेळी प्रशिक्षणाची ठिकाणे, प्रशिक्षण देणारे कमांडर तसेच त्यांच्या शरीरयष्टीचे वर्णन एफबीआयने नोंदवून घेतले. उपलब्ध माहितीवरून या पथकाने त्याला प्रशिक्षण देणाऱ्यांचे स्केचेसही काढल्याचे सांगण्यात येते.
मुंबई हल्ल्यासंबंधी अमेरिकी कायद्याप्रमाणे गुन्हा दाखल करून अतिरेक्‍यांनी अमेरिकन नागरिकांचा छळ करून हत्या केली का, याचा एफबीआयचे पथक शोध घेत आहे. यापूर्वीच एफबीआयच्या पथकाने मृत अतिरेक्‍यांचे डीएनए नमुने तपासणीसाठी काढून घेतले आहेत. या हल्ल्यात वापरलेले हॅन्ड ग्रेनेड अफगाणिस्तान येथील अतिरेकी कारवाईत वापरलेल्या हॅन्ड ग्रेनेडशी मिळतेजुळते असल्याने त्याचा पुरवठा करणाऱ्याचाही शोध हे पथक घेत आहे.