करकरे, कामटेंसह 111 जणांना राष्ट्रपतींचे पोलिस पदक

राज्यपालांच्या हस्ते गौरव : ढेरे, माथुर, मारिया, दातेंचाही समावेश

महाराष्ट्र पोलिस दलातील 111 अधिकारी, कर्मचाऱ्यांना 2007-08 सालातील कामगिरीबद्दल राष्ट्रपतींचे पोलिस पदक बहाल करून गौरविण्यात आले आहे. यात दहशतवादविरोधी पथकाचे तत्कालीन प्रमुख शहीद हेमंत करकरे (उल्लेखनीय सेवा), अतिरिक्त पोलिस आयुक्त शहीद अशोक कामटे (गुणवत्तापूर्ण सेवा) यांसह ठाण्याचे पोलिस आयुक्त अनिल ढेरे, एअर इंडियाचे सुरक्षा संचालक सतीश माथुर, मुंबईतील गुन्हे शाखेचे सहपोलिस आयुक्त राकेश मारिया आणि अतिरिक्त पोलिस आयुक्त सदानंद दाते आदींचा समावेश आहे. मुंबई पोलिस दलातील राजेंद्र शंकर काळे आणि दिवंगत प्रदीप राजाराम निंबाळकर (मरणोत्तर) या पोलिस शिपायांना राष्ट्रपतींचे शौर्य पदक देण्यात आले.

राज्यपाल एस. सी. जमीर यांच्या हस्ते आज हे पुरस्कार प्रदान करण्यात आले. पोलिस महासंचालक कार्यालयात झालेल्या या पदक वितरण सोहळ्याला राज्यभरातील निवडक पोलिस अधिकारी व कर्मचारी उपस्थित होते. राज्यात बहाल झालेल्या या 111 पदकांत दोन शौर्य पदके, उल्लेखनीय सेवेबद्दलची आठ पदके तसेच गुणवत्तापूर्वक सेवेबद्दलच्या 101 पदकांचा समावेश आहे.

काळे, निंबाळकरांना शौर्य पदक
मुंबई पोलिस दलातील राजेंद्र शंकर काळे आणि दिवंगत प्रदीप राजाराम निंबाळकर (मरणोत्तर) या पोलिस शिपायांना राष्ट्रपतींचे शौर्यपदक देण्यात आले. दहिसर पोलिस ठाण्यात नेमणुकीवर असलेल्या राजेंद्र काळे यांनी 3 सप्टेंबर 2006 रोजी रात्रीच्या गस्तीदरम्यान धावतच दिवाकर ऊर्फ रॉकी भैरवनाथ यादव या सराईत गुन्हेगाराचा पाठलाग करून त्याला अटक केली होती. प्रदीप निंबाळकर यांना 26 जुलै 2005 च्या अतिवृष्टीत कुर्ला-नेहरूनगर येथे पुराच्या पाण्यात अडकलेल्यांचे प्राण वाचविताना मृत्यूला सामोरे जावे लागले.

उल्लेखनीय सेवेसाठी देण्यात आलेल्या राष्ट्रपती पदकांत वाहतूक शाखा ठाणे येथील पोलिस उपायुक्त सुधीर दाभाडे, पुण्याचे सहायक पोलिस आयुक्त विनोद सातव, ठाणे येथील राखीव पोलिस बलाचे निरीक्षक पितांबर पाडवी, दिवंगत पोलिस अधिकारी रफीउद्दीन मोहिनुद्दीन सय्यद यांचा समावेश आहे.

गुणवत्तापूर्वक सेवेसाठी राज्य मानवी हक्क आयोगाचे महानिरीक्षक डी. कनकरत्नम, ठाण्याचे अप्पर पोलिस आयुक्त विवेक फणसाळकर, अतिरिक्त पोलिस आयुक्त शहीद अशोक कामटे, अतिरिक्त पोलिस आयुक्त सदानंद दाते, केंद्रीय गुन्हे अन्वेषण विभागाचे पोलिस उपमहानिनिरीक्षक व्ही. व्ही. लक्ष्मीनारायण, पुण्याच्या अप्पर पोलिस आयुक्त शोभा ओहटकर, नागपूर येथील पोलिस प्रशिक्षण विद्यालयाचे प्राचार्य सुनील पारसकर, नाशिक येथील लाचलुचपत प्रतिबंधक खात्याचे पोलिस अधीक्षक बाळासाहेब शेखर, गावदेवी येथील सहायक पोलिस आयुक्त सदाशिव पाटील, सेवानिवृत्त पोलिस उपअधीक्षक अनिलकुमार जगताप, सेवानिवृत्त सहायक समादेशक दिनकर हिरेमणी यांच्यासह 101 जणांना राष्ट्रपती पदके देण्यात आली.

गुणवत्तापूर्वक सेवेबाबत पोलिस पदके देण्यात आलेल्या अन्य अधिकाऱ्यांची नावे पुढीलप्रमाणे : पोलिस अधीक्षक पांडुरंग कोहीनकर (लाचलुचपत प्रतिबंधक खाते), पोलिस निरीक्षक दिनेश अहिर, मिलिंद खेतले (गुन्हे शाखा, मुंबई), शशिकांत सुर्वे, भीमदेव राठोड (दहशतवादविरोधी पथक, मुंबई), अशोक जगताप (ठाणे), सहायक पोलिस निरीक्षक राजन चव्हाण (मुंबई), पोलिस उपनिरीक्षक भगवान सूर्यवंशी (सेवानिवृत्त), बाळासाहेब गाडेकर (मुंबई), पोलिस निरीक्षक दशरथ खुले (राज्य राखीव पोलिस बल गट- 8, मुंबई), सहायक पोलिस उपनिरीक्षक मधुकर जाधव (मुंबई), भागवत इंगळे (राज्य राखीव पोलिस गट क्रमांक- 11, नवी मुंबई), पोलिस हवालदार ज्ञानेश्‍वर थोरात (मुंबई), संभाजी जाधव (ठाणे), सूर्यकांत तटकरे (मुंबई), अण्णा गोरे (रेल्वे, मुंबई), प्रदीप जाधव, आनंदराव पाटील, शिवाजी कदम (ठाणे), विलास गणेशकर (मुंबई), पोलिस नाईक अभय दुदवडकर (मुंबई), अथरखान तडवी (ठाणे) आणि पोलिस हवालदार सुनील सावंत (गुन्हे शाखा, नवी मुंबई).

(sakal, 25jan)