मुतालिकच्या चौकशीसाठी एटीएस मंगळूरला जाणार

कर्नाटक पोलिसांनी अटक केलेला श्रीराम सेनेचा अध्यक्ष प्रमोद मुतालिक याचा मालेगाव बॉम्बस्फोटाशी असलेल्या कथित संबंधाची चौकशी करण्यासाठी दहशतवादविरोधी पथकाची एक तुकडी मंगळूर येथे पाठविण्यात येणार असल्याची माहिती या पथकाचे प्रमुख अतिरिक्त पोलिस महासंचालक के. पी. रघुवंशी यांनी दिली. चौकशीत त्याचा मालेगाव स्फोटाशी संबंध उघडकीस आल्यास त्याला मुंबईत आणले जाईल, असेही रघुवंशी यांनी सांगितले.
कर्नाटक येथे एका पबवर केलेल्या हल्ल्याप्रकरणी श्रीराम सेनेचा अध्यक्ष प्रमोद मुतालिक याला पोलिसांनी अटक केली आहे. मुतालिक याने केलेल्या एका भाषणात मालेगाव स्फोटातील आरोपी साध्वी प्रज्ञासिंग आणि लेफ्टनंट प्रसाद पुरोहित यांच्या नावांचा उल्लेख "एटीएस'च्या पोलिसांना आढळला आहे. याशिवाय मालेगाव बॉम्बस्फोट प्रकरणातील आरोपींच्या चौकशीतही श्रीराम सेनेचा उल्लेख आढळत असल्याने प्रमोद मुतालिक चौकशीच्या फेऱ्यात सापडला आहे. सध्या मंगळूर पोलिसांच्या ताब्यात असलेल्या मुतालिकची तेथेच चौकशी केली जाईल. मालेगाव बॉम्बस्फोट प्रकरणात एटीएसला प्रवीण मुतालिक या आरोपीची आवश्‍यकता आहे. मालेगाव स्फोटात महत्त्वाची भूमिका बजावलेला प्रवीण फरारी असल्याचेही रघुवंशी यांनी या वेळी सांगितले.

(sakal,29 jan)