पंतप्रधान मनमोहन सिंग मुंबई दौऱ्यावर

मुंबईवर झालेल्या दहशतवादी हल्ल्यानंतर पंतप्रधान मनमोहन सिंग उद्या (ता.17) पहिल्यांदाच मुंबई दौऱ्यावर येत असून अतिरेक्‍यांच्या हल्ल्यात लक्ष्य ठरलेल्या हॉटेल ट्रायडन्ट- ओबेरॉय ला ते भेट देणार आहेत.याशिवाय ऐतिहासिक हॉटेल ताज, छत्रपती शिवाजी टर्मिनस आणि नरिमन हाउस या अतिरेकी हल्ला झालेल्या ठिकाणांना देखील ते भेट देण्याची शक्‍यता वर्तविण्यात येत आहे.
पंतप्रधान सिंग एका पारितोषिक वितरण कार्यक्रमानिमित्त मुंबईत येत आहेत. पारितोषिक वितरणाचा हा कार्यक्रम यापूर्वी हॉटेल ट्रायडन्टमध्येच 28 नोव्हेंबरला होणार होता. मात्र मुंबईवर झालेल्या अतिरेकी हल्ल्यानंतर तो कार्यक्रम रद्द करण्यात आला होता. उद्या पंतप्रधान मुंबई विमानतळावर उतरल्यानंतर हेलिकॉप्टरने दक्षिण मुंबईत असलेल्या नौदलाच्या आयएनएस कुंजली या तळावर उतरतील.त्यानंतर त्यांचा दौरा सुरू होणार असल्याचे अधिकृत सूत्रांनी सांगितले.