पोलिस दल आधुनिकीकरणासाठी 90 कोटींचा निधी मंजूर

मुंबईत झालेल्या अतिरेकी हल्ल्याच्या पार्श्‍वभूमीवर पोलिस दलाचे आधुनिकीकरण करण्यासाठी उपमुख्यमंत्र्यांच्या अध्यक्षतेखाली स्थापन करण्यात आलेल्या मंत्रिगटाच्या बैठकीत 89 कोटी 59 लाख रुपयांच्या खर्चाला मान्यता देण्यात आली.
उपमुख्यमंत्री छगन भुजबळ यांच्या अध्यक्षतेखाली पोलिस दलाच्या आधुनिकीकरणासाठी विशेष समिती स्थापन करण्यात आली. या समितीने सुचविलेल्या शिफारशीच्या अनुषंगाने सागरी गस्तीकरिता 12 वेगवान बोटी खरेदी करण्यात येणार आहेत. प्रत्येक बोटीकरिता चार कोटी याप्रमाणे 48 कोटी रुपये आणि त्यांच्या साधनसामग्रीसाठी एक कोटी 49 लाख रुपयांचा खर्च केला जाणार आहे. फक्त मुंबई पोलिस दलाकरिता साधनसामग्री व सुरक्षाविषयक उपकरणांची खरेदी करण्याकरिता 36 कोटी 63 लाख 30 हजार रुपयांच्या खर्चाला सरकारने मंजुरी दिली. यात 12 डिजिटल व्हिडीओ कॅमेरे, 24 सर्चलाइट, 12 जीपीएस सिस्टीम, 19 सॅटेलाइट फोन, 12 सिग्नल पिस्तूल, 120 लाइफ जॅकेट्‌स, 60 रिंगगार्ड, 100 हेल्मेट्‌स विथ टॉर्च, 80 डंगरी आणि वाहने यासाठी हा निधी खर्च करण्यात येणार आहे.


(sakal,14 jan)