वरिष्ठ पोलिस निरीक्षकपदी 34 अधिकाऱ्यांची नियुक्ती

54 पोलिस अधिकाऱ्यांना बढती

लोकसभा निवडणुकीपूर्वी मुंबई पोलिस दलातील वरिष्ठ पोलिस निरीक्षकांना सहायक पोलिस आयुक्तपदावर पदोन्नती मिळाल्यानंतर रिक्त असलेल्या 34 जागांवर आज नवीन नेमणुका करण्यात आल्या. याशिवाय पोलिस निरीक्षकपदावर कार्यरत असलेल्या अन्य 54 अधिकाऱ्यांना वरिष्ठ पोलिस निरीक्षकपदावर बढती देण्यात आली आहे.

राज्य पोलिस दलातील वरिष्ठ पोलिस निरीक्षकांच्या लोकसभा निवडणुकीपूर्वी सहायक पोलिस आयुक्तपदावर नेमणुका झाल्यानंतर मुंबईतील तीसहून अधिक पोलिस ठाण्यांना वरिष्ठ पोलिस निरीक्षकच नव्हते. या पोलिस ठाण्यांचा कारभार, अतिरिक्त कार्यभार देऊन पोलिस निरीक्षकांमार्फत चालविला जात होता. लोकसभा निवडणुकीच्या बंदोबस्ताच्या कालावधीत या पदांवर नवीन अधिकाऱ्यांची नेमणूक करणे बाकी होते. निवडणुका संपल्यानंतर गेले काही महिने रिक्त असलेली वरिष्ठ पोलिस निरीक्षकांची ही पदे आज भरण्यात आली. त्यानुसार 34 वरिष्ठ पोलिस निरीक्षकांना पोलिस ठाण्यांच्या ठिकाणी नेमणुका देण्यात आल्या आहेत. 1981 व 1983 च्या बॅचच्या 54 पोलिस निरीक्षकांनाही वरिष्ठ पोलिस निरीक्षक म्हणून पदोन्नती देण्यात आली आहे. यात 1983 च्या बॅचमधील 35 अधिकाऱ्यांचा समावेश आहे.

वरिष्ठ पोलिस निरीक्षकांच्या नव्याने झालेल्या नेमणुकांपैकी शाहूनगरचे वरिष्ठ पोलिस निरीक्षक एम. ए. गुंडेवाडी यांची शिवाजी पार्क पोलिस ठाण्याच्या वरिष्ठ पोलिस निरीक्षकपदी नेमणूक झाली. घाटकोपरचे वरिष्ठ पोलिस निरीक्षक जी. टी. पडवळ यांची बदली गुन्हे शाखेत, जोगेश्‍वरीचे वरिष्ठ पोलिस निरीक्षक अंधेरी येथे, तर धारावीचे वरिष्ठ पोलिस निरीक्षक आर. आर. ठाकूर यांची कस्तुरबा मार्ग पोलिस ठाण्याचे वरिष्ठ पोलिस निरीक्षक म्हणून बदली झाली. पदोन्नतीने वरिष्ठ पोलिस निरीक्षक झालेल्या अधिकाऱ्यांपैकी बी. एच. भावले यांची नेमणूक आझाद मैदान, एस. आर. धनेधर यांची साकी नाका, एस. एस. सूर्यवंशी यांची पंतनगर, पी. एस. जोडगुजरी यांची शिवाजीनगर पोलिस ठाण्याच्या वरिष्ठ पोलिस निरीक्षकपदी झाली. याशिवाय आर्थिक गुन्हे शाखेतील वरिष्ठ पोलिस निरीक्षक पद्माकर जुईकर हे ऍन्टॉप हिल, तर नियंत्रण कक्षातील पोलिस निरीक्षक परशुराम काकड हे दहिसर पोलिस ठाण्याचे वरिष्ठ पोलिस निरीक्षक म्हणून कारभार संभाळणार आहेत. सांताक्रूझ पोलिस ठाण्यात एम. पी. चौधरी, गावदेवी पोलिस ठाण्यात एस. डब्ल्यू. दिवाडकर, तर ट्रॉम्बे पोलिस ठाण्यात एस. बी. जगताप वरिष्ठ पोलिस निरीक्षक म्हणून रुजू होणार आहेत. जोगेश्‍वरीला आर. व्ही. भोसले यांची, तर पार्कसाईटला एस. एम. घुगे यांची वरिष्ठ पोलिस निरीक्षक म्हणून नेमणूक करण्यात आली.
माता रमाबाई आंबेडकर मार्ग पोलिस ठाण्याचे एस. पी. बाबर, शिवाजी पार्कचे विलास गुरव, आझाद मैदानचे प्रकाश शिशुपाल आणि दहिसरचे आर. व्ही. केणी यांची स्थानिक शस्त्र शाखेत नेमणूक करण्यात आली.

(sakal,23rd may)