गृहनिर्माणच्या महासंचालकपदी ए. एन. रॉय यांची नियुक्ती

आदेश जारी : प्रस्तावावर मुख्यमंत्र्यांची स्वाक्षरी

गृहनिर्माण विभागाचे पोलिस महासंचालक एस. एस. विर्क यांची राज्याचे पोलिस महासंचालक म्हणून नियुक्ती झाल्यानंतर रिक्त असलेल्या गृहनिर्माण विभागाच्या महासंचालकपदावर माजी पोलिस महासंचालक ए. एन. रॉय यांची नियुक्ती करण्यात आली आहे. यासंबंधी गृहखात्याने दिलेल्या प्रस्तावावर मुख्यमंत्र्यांनी स्वाक्षरी केली असून, या नियुक्तीचे आदेश काढण्यात आले आहेत.
तीन अधिकाऱ्यांची सेवाज्येष्ठता डावलून राज्याच्या पोलिस महासंचालकपदी ए. एन. रॉय यांची केलेली नेमणूक उच्च न्यायालयाने बेकायदा ठरविल्यानंतर या जागी गृहनिर्माण विभागाचे पोलिस महासंचालक एस. एस. विर्क यांची नेमणूक करण्यात आली. विर्क यांच्या नियुक्तीनंतर रॉय दीर्घकालीन रजेवर गेले होते. सरकारने कोणतीही नवीन नियुक्ती न दिल्यामुळे रॉय गेल्या काही दिवसांपासून नवीन नियुक्तीच्या प्रतीक्षेत होते, मात्र राज्यात लोकसभा निवडणुकीची धामधूम असल्याने रॉय यांच्या नवीन नियुक्तीचा प्रस्ताव बाजूला ठेवण्यात आला होता. काल मुंबई व ठाणे येथील 10 जागांकरिता तिसऱ्या टप्प्यात निवडणुका होण्यापूर्वी मुख्यमंत्री अशोक चव्हाण यांनी रॉय यांच्या नियुक्तीच्या गृहखात्याच्या प्रस्तावावर सह्या करून आदेशही काढले. रॉय गृहनिर्माण विभागाच्या महासंचालकपदावर दुसऱ्यांदा रुजू होत आहेत. राज्याच्या पोलिस महासंचालकपदावर नियुक्ती होण्यापूर्वी ते याच विभागाचे महासंचालक म्हणून कार्यरत होते.


(sakal,1st may)