प्रियांका चोप्राविरोधात पोलिसांत तक्रार

म्युझिकचा धांगडधिंगा ः पार्टी आयोजकाला न्यायालयात हजर राहण्याचा आदेश

अभिनेत्री प्रियांका चोप्रा हिने आपल्या मित्रमंडळींना गुरुवारी रात्री आपल्या घरी दिलेली पार्टी तिला चांगलीच भोवण्याची चिन्हे आहेत. पहाटे उशिरापर्यंत धांगडधिंग्यात सुरू असलेल्या या पार्टीत मोठ्या आवाजात साऊंड सिस्टीम वाजविल्याप्रकरणी तिच्या सोसायटीतील रहिवाशांनी वर्सोवा पोलिस ठाण्यात तिच्याविरुद्ध तक्रार दिली आहे. याप्रकरणी पोलिसांनी पार्टी आयोजित करणाऱ्याकडून पाच हजार रुपयांची अनामत रक्कम घेतली असून, त्याला उद्या न्यायालयात हजर राहण्यास सांगितले आहे.
प्रियांकाने तिच्या वर्सोवा येथील "राज क्‍लासिक' सोसायटीतील घरात काल रात्री मित्रांसाठी एक पार्टी ठेवली होती. बॉलीवूडमधील अनेक कलाकार या पार्टीला उपस्थित होते. या पार्टीत शुक्रवारी पहाटेपर्यंत जोरजोरात साऊंड सिस्टीम सुरू होती. म्युझिकच्या मोठ्या आवाजाने सोसायटीतील रहिवाशांची झोपमोड झाल्याने ते चांगलेच संतापले. त्यांनी आवाज कमी करून पार्टी करण्याच्या सूचना प्रियांकाला केल्या; पण तिने त्याकडे दुर्लक्ष केले. पहाटे अडीचपर्यंत हा प्रकार तसाच सुरू राहिल्याने रहिवाशांनी प्रियांकाविरुद्ध पोलिस नियंत्रण कक्षात तक्रार दिली. नियंत्रण कक्षातील पोलिसांनी ही माहिती वर्सोवा पोलिसांना कळविली. त्यानंतर सोसायटीत पोचलेल्या पोलिसांनी ही साऊंड सिस्टीम बंद करायला लावली आणि पार्टी आयोजित करणाऱ्या राजा मोहम्मद बशीर याच्याविरुद्ध दंडात्मक कारवाई केली. त्याला उद्या न्यायालयात बोलाविण्यात आल्याचे सूत्रांनी सांगितले.


(sakal,1st may)